Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 333 Hüküm no: 481 Orijinal metin no: [72a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma Hanım’ın cariyesini azat ettiği Mahmiye-i İstanbul’da hâlâ Arabacılar meydanı kurbünde sâkine fahrü’l-muhadderâti’l-mükerreme zahru’l-muvakkarâti’l-mu‘azzama Fâtıma Hanım bt. merhûm ve mağfûrun-leh Murad Paşa taraf-ı bâhirü’ş-şereflerinden ıtk-ı âti’l-beyânı âzâda vekil olan müşârun-ileyhânın zâtını ma‘rifet-i şer‘iyye ile ârifân olan el-Hâc Mehmed b. el-Hâc Âşur b. ( ) ve Hamza Bey b. Abdullah el-cündî şehâdetleri ile şer‘an vekâleti sâbite olan mefharü erbâbi’t-tahrîr ve’l-kalem zübdetü ashâbi’l-izzi ve’r-rakam Zülfikār Efendi b. Abdullah meclis-i şer‘-i hatîr-i lâzımü’t-tevkīre gelip bi’l-vekâle ikrâr ve takrîr-i kelâm edip müvekkile-i müşârun-ileyhâ hazretlerinin silk-i mülkünde münselik olup kendüye rıkkını mu‘terife olan kasrü’l-kāde, dudağının üstünde beni var, alt dişleri iri, Rusiyyetü’l-asl hâfızatü haze’r-rakīm Firuze nâm câriye-i memlûkesini târîh-i kitâbdan iki ay mukaddem hasbeten lillâhi te‘âlâ ve hasbeten li-rûhi rasûlihi’l-mu‘allâ tahrîr ve i‘tâk edip rakabesini dîk-i rıkdan ıtlâk eyledi mevsûf-ı mezkûre sâir harâir-i asliyyât gibi hürre olup üzerinde müvekkile-i mûmâ-ileyhânın velâdan gayrı hakkı kalmadı dedikde mezbûre Firuze’nin ıtkına hüküm-birle mâ-vaka‘a bi’t-taleb ketb olundu. Fî-gurreti Zilhicceti’ş-şerîfe li-sene erba‘a ve sittin ve elf. Şuhûdü’l-hâl: Siyâmî Efendi el-imâm, Ali Çelebi b. Abdullah, Kadri Beşe teberdâr, diğer Hamza Bey el-cündî, Ali Bey er-râcil, Ahmed b. Ali, Hüseyin b. Hasan, Pîrî b. Hüseyin ve gayruhum.