Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 394 Hüküm no: 425 Orijinal metin no: [61a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ekmekçi ustası Aleksan’ın ayaklarından rahatsız olduğundan un kapanına palan ile binerek gidip gelmesine izin verildiği Ma‘rûz Bâ-sah İ‘lâmı mûcebince rükûbuna mümâna‘at olunmaya deyü buyruldu İstanbul’da Yenikapı dâhilinde kebîr ekmekci fırınının ve Gül Câmi‘i’nde ve Küçük Mustafa Paşa çarşısında olan fırınların ustası olan Aleksan v. Artin nâm Ermeni meclis-i şer‘de benim tasarrufumda olan mârrü’z-zikr üç aded fırının zahîrelerini iştirâ için un kapanına varıp esnafımız beynlerinde olan tevzî‘den hissemi iştirâya muhtâc olup ancak illet-i vücûdum olduğundan gayrı ayaklarım alîl olmağla mâşiyen kapana varıp gelmeye iktidârım olmayıp mukaddem dahi palan ile râkib olduğuma mümâna‘at olunmaya deyü yedimde olan arzuhâlim bâlâsına fermân-ı âlî dahi ihsân olunmağla hâlâ yine mâşiyen varmağa iktidârım olmamağla ba‘de’l-mu‘âyene ve’l-müşâhede vâki‘ hâl hırfetimizden olup işbu hâzırûn bi’l-meclis olanlardan istihbâr olundukdan sonra palan ile rükûben ber-vech-i muharrer kapan-ı dakīka varmağa ruhsat verilmek murâdımdır dedikde hakīkat-i hâl merkūmun ayakları alîl olduğu ba‘de’l-müşâhede merkūm Aleksan üç aded fırının ustası olup minvâl-i muharrer zahîre tedâriki için kapan-ı dakīka varmağa muhtâc olduğunu Ekmekciler Kethüdâsı Mehmed Ağa ve Yiğitbaşı Ömer Çelebi ve Sayıcı es-Seyyid Musa ve hırfet-i mezbûreden altı nefer Müslim ve on nefer zimmîler haber vermekle merkūm Aleksan ber-vech-i muharrer palan ile rükûben mahall-i mezbûra varmağa merhameten ruhsat verilmek üzere bâlâ-yı i‘lâma fermân-ı âlî ihsân buyrulmak ricâsında olduğu iltimâslarıyla huzûr-ı âlîlerine i‘lâm olundu. Bâkī emr ü fermân hazret-i men-lehü’l-emrindir. Fî-gurreti Za sene 1152.