Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 393 Hüküm no: 424 Orijinal metin no: [60b-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Özürsüz olarak üzerinden on beş sene geçen davalara bakılmadığı Bâ-mühr-i efendi Ma‘rûz Sâhib-i arzuhâl Galatalı İbrahim dîvân-ı âlîlerinde hasmı Sarrâf Bağdasar’dan yirmi yedi sene mukaddem Vidin nâzırı Balat Hamamcısı İbrahim Ağa Vidin’de bana mâlından yedi kîse akçesini Âsitâne’de mesfûr Bağdasar’a teslîm etmek üzere verip ve bana dahi iki bin guruş karz vermekle ben dahi sene-i mezbûrede Âsitâne’ye gelip yedimde emânet olan yedi kîse akçeyi Sulu Han’da odasında merkūm Bağdasar’a teslîm edip mâlından dahi bin dört yüz guruş emâneten merkūma def‘ ü teslîm etmiş idim hâlâ taleb ederim deyü ba‘de’d-da‘vâ mezbûr İbrahim Reis’in takrîr üzere târîh-i mezbûrdan beri yirmi yedi sene mürûr edip ve merkūm dahi yedinde bir nesnesi olmadığını münkir olmağla bilâ-özr on beş sene mürûr eden da‘vânın bilâ-emr istimâ‘ından hükkâm memnû‘lar olmağla mezbûrdan özrü istifsâr olundukda mezbûr İbrahim Ağa sene-i mezbûrede Âsitâne’ye gelip meblağ-ı mezbûr iki bin guruşu tahsîl için bir sene habs ettirip halâs olduğumda sefîne ile Abaza’ya sefer ettiğimde üç sene esîr olup ba‘de’l-halâs on dört sene dahi Kırım’da ikāmet edip bu vechile on sekiz sene mürûr edip Âsitâne’ye geleli dokuz sene olmağla da‘vâ-yı mezbûreye kādir olmadığıma yedimde fetvâ-i şerîfem dahi vardır deyü ber-vech-i muharrer özrünü beyân için meclis-i şer‘a beş nefer kimesneler mezbûr İbrahim Reis [61a] birkaç sene diyâr-ı âhardan Âsitâne’ye gelip gittiği ma‘lûmumuzdur deyüp mezbûrun iddi‘âsı üzere özrünü beyan edemeyip bi’d-defa‘ât mezbûr imhâl olundukda takrîri üzere beyâna kādir olmamağla bilâ-özr yirmi yedi sene mürûr eden da‘vânın bilâ-emr istimâ‘ı memnû‘ olup ve da‘vâsında tezvîr dahi fehm olunmağla mezbûr İbrahim Reis bi-gayr-ı vechin mu‘ârazadan men‘ olunduğu huzûr-ı âlîlerine i‘lâm olundu. El-emru li-men-lehü’l-emr. Fî 4 Zilhicce sene 1152.