Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 396 Hüküm no: 429 Orijinal metin no: [61a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdullah Efendi’nin cariyesi Havva’nın hür olduğunu ispat ettiği Ma‘rûz Sâbıkā rıkkiyetini mu‘terife ve ber-vech-i âtî da‘vâya kıbel-i şer‘den me’zûne olan uzun boylu, elâ gözlü Havva nâm-ı diğer Mahbube nâm mühtediye meclis-i şer‘de kendüye rakīka olmak üzere vâzı‘u’l-yed olan sâhib-i arzuhâl Abdullah Efendi mahzarında ben Mora cezîresinde vâki‘ Anabolu kasabası mahallâtından Hünkâr Câmi‘-i şerîfi mahallesinde mütemekkin ehl-i zimmet re‘âyâlarından Terzi Yorgaki v. Petro nâm zimmînin firâşından hâsıla ve zevcesi Kostine bt. Yani nâm Nasrâniyeden mütevellide olup ben ber-vech-i muharrer hürre iken mezbûr Abdullah Efendi bana Gürciye cinsinden rakīkası olmak üzere vaz‘-ı yed eder suâl olunup kasr-ı yedine tenbîh ve sebîlim tahliye olunmak matlûbumdur deyü da‘vâ eyledikde merkūm Abdullah Efendi cevâbında mevsûfe-i mezbûreyi gāibân ani’l-meclis Edirneli el-Hâc Ebubekir oğlu Memiş Beşe nâm kimesne ile zevcesi Fâtıma nâm hatundan Gürciyyetü’l-asl rakīkaları olmak üzere üç yüz kırk beş guruş semen-i medfû‘ ve makbûza iştirâ ve tesellüm etmekle câriyeyi müşterâsı olmak üzere vaz‘-ı yedini ikrâr mâ‘adâyı inkâr etmeğin mevsûfe-i mezbûre ber-vech-i muharrer müdde‘âsını aslında Anabolu ahâlîsinden olup lede’t-tezkiye adâletleri zâhir olan es-Seyyid el-Hâc Hüseyin b. es-Seyyid Ahmed ve Hüseyin b. Ahmed ve Mustafa Odabaşı b. Ali ve Molla Mehmed b. Hacı Ahmed ve Mustafa b. Hüseyin şehâdetleriyle merkūm Abdullah Efendi muvâcehesinde vech-i şer‘î üzere isbât etmeğin mûcebince mevsûfe-i mezbûre Havva nâm-ı diğer Mahbube’nin hürriyetine ba‘de’l-hükm merkūm Abdullah Efendi’nin kasr-ı yedine tenbîh ve sebîli tahliye olunduğu huzûr-ı âlîlerine i‘lâm olundu. El-emru li-men-lehü’l-emr. Fî 6 min-Zilhicceti’ş-şerîfe sene 1152.