Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 395 Hüküm no: 428 Orijinal metin no: [61a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haçador’un borcunu ödeyip vefaen ferağ ettiği evini teslim aldığı Ma‘rûz İstanbul’da Edirnekapısı kurbünde Ali Paşa-i atîk mahallesinde mütemekkin Haçador zimmî Bâb Mahkemesi’nde meclis-i şer‘de bundan akdem vefât eden Ahmed Efendi’nin karındaşı Abdullah Çelebi muvâcehesinde zikri âtî vakfın mütevellîsi el-Hâc Mehmed Efendi hâzır olduğu halde târîh-i kitâbdan on altı ay mukaddem Süleyman Subaşı Vakfı’ndan mahalle-i mezbûrede vâki‘ lede’l-ahâlî ve’l-cîrân ma‘lûmü’l-hudûd mutasarrıf olduğum menzilimi müteveffâ-yı mezbûra seksen guruş mukābelesinde rehin olmak üzere bâ-ma‘rifet-i mütevellî vefâen ferâğ etmiş idim, hâlâ menzil-i mezbûr Abdullah Çelebi’nin zabtında olmağla meblağ-ı mezbûru yedimden ahz u kabz edip menzilimi bana teslîme tenbîh olunması murâdımdır deyü da‘vâ ol dahi ferâğ-ı mezkûrun vefâen olduğunu inkâr eyledikde müdde‘î-i mesfûr Haçador zimmî müdde‘âsını Mustafa b. Receb ve es-Seyyid Salih b. Ali şehâdetleriyle vech-i şer‘î üzere isbât etmeğin mûcebiyle menzil-i mezbûru bâ-ma‘rifet-i mütevellî müdde‘î-i mezbûra teslîme merkūm Abdullah Çelebi’ye tenbîh olunduğu huzûr-ı âlîlerine i‘lâm olundu. El-emru li-men-lehü’l-emr. Fî 4 min-Zilhicceti’ş-şerîfe sene 1152.