Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 334 Hüküm no: 483 Orijinal metin no: [72b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Donda’nın vârislerinden azatlı kölesinin terekeden hakkını aldığı Galata kazâsına tâbi‘ İstinye nâhiyesinde vâki‘ Ortaköy’de sâkin iken hâlike olan Donda nâm hâlikenin verâseti zevci Pavli v. Panayot ve usûbet-i nesebiye cihetinden mu‘takası Kadın bt. Yasef nâm Yahûdiye’ye münhasıra oldukdan sonra kable’l-kısmet mezbûr Pavli dahi hâlik olup verâseti li-ebeveyn karındaşları Mihal ve Servik nâm zimmîlere münhasıra oldukdan sonra mezbûre Kadın tarafından husûs-ı âti’l-beyâna vekîl olup İslam Beşe b. Receb nâm kimesne ile Yani v. Yorgi nâm zimmî şehâdetleri ile vekâleti sâbite olan Katalan cemâ‘atinden Mayer v. Salamon nâm Yahûdi mahfil-i kazâda mezbûrân Mihal ve Servik muvâcehesinde bi’l-vekâle ikrâr-ı tâm ve takrîr-i kelâm edip müvekkilem mezbûrenin hâlike-i merkūme Donda’nın muhallefâtından bi-hükmi’l-münâsaha isâbet eden hisse-i şer‘iyyesini bi’t-tamam ahz u kabz edip mezbûrân zimmîlerin hâlike-i mezbûrenin muhallefâtına müte‘allika da‘vâdan zimmetlerin ibrâ-i âmm-ı kātı‘u’n-nizâ‘ ile ibrâ ve ıskāt eyledi dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Tahrîren fi’l-yevmi’s-sâbi‘ min-Zilhicceti’ş-şerîfe li-sene erba‘a ve sittin ve elf. Şuhûdü’l-hâl: Mustafa Efendi b. Hüseyin, Mehmed Efendi b. Mahmud el-imâm, Mustafa Çelebi el-müezzin, Ahmed Beşe b. Hasan, Pîrî Bey b. Erdoğdu, Mehmed b. Ebûbekir, Rıdvan b. Abdullah.