Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 334 Hüküm no: 484 Orijinal metin no: [72b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yorgi v. Kostantin’in kazancı aletlerini sattığı Kazgancı tâifesinden Yorgi v. Kostantin nâm zimmî meclis-i şer‘-i hatîr-i lâzımü’t-tevkīrde tâife-i merkūmeden işbu bâ‘isü’r-rakīm Banol v. Hamade nâm zimmî muvâcehesinde ikrâr ve takrîr-i kelâm edip silk-i mülkümde olan kazgan âlâtından yüz yirmi beş çekiç ve bir demir mogulu? ve bir körüğümü mezbûr Banol’a iki bin beş yüz akçeye safka-i vâhide ile bey‘ ve teslîm ol dahi iştirâ ve tesellüm eyledikden sonra semeni olan meblağ-ı mezbûr iki bin beş yüz akçeyi müşteri-i mezbûr yedinden bi’t-tamam ahz u kabz edip zikr olunan eşyâ mezbûr Banol’un mülk-i müşterâsı olmuşdur dedikde gıbbe’ş-şer‘i mâ-vaka‘a bi’t-taleb ketb olundu. Fi’l-yevmi’s-sâmin min-Zilhicceti’ş-şerîfe li-sene erba‘a ve sittin ve elf. Şuhûdü’l-hâl: Mustafa Beşe b. Abdullah, Şa‘ban b. Abdullah, İbrahim b. ( ) kılıçcı, İbrahim Çelebi b. Davud, Yordan v. Şiro, Vaskez v. Kalonye ve gayruhum mine’l-hâzırîn.