Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 412 Hüküm no: 462 Orijinal metin no: [63b-8] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdullah Ağa’nın Hüseyin için Ruscuk’dan getirdiği altınlardan kalan kısmı vermesi gerektiği Bâ-mühr-i efendi Sâhib-i arzuhâl Hüseyin meclis-i şer‘de derûn-ı arzuhâlde mastûrü’l-ism Abdullah Ağa muvâcehesinde Ruscuk kazâsında Çırnovi karyesinde başbuğ olan Çani Cenerali zimmetinde cihet-i ücretden yüz yirmi fındık altını hakkım olup bundan akdem merkūm Çani Cenerali zikr olunan yüz yirmi altını bana vermek için mezbûr Abdullah Ağa’ya teslîm eylediğinde ol dahi ahz ve elli altını bana teslîm edip yetmiş altını yedinde kalmışdır, hâlâ taleb ederim deyü ba‘de’d-da‘vâ ve’l-inkâr müdde‘î-i mezbûr müdde‘âsını isbâta kādir olmayıp bi’t-taleb merkūm Abdullah Ağa’ya vech-i şer‘î üzere bi’d-defa‘ât yemîn teklîf olundukda ol dahi nükûl etmeğin mûcebince meblağ-ı bâkī-yi mezbûr yetmiş fındık altını müdde‘î-i mezbûra teslîme merkūm Abdullah Ağa’ya tenbîh olunduğu huzûr-ı âlîlerine i‘lâm olundu. Fî 24 min-Zilhicce sene 1152.