Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 412 Hüküm no: 463 Orijinal metin no: [64a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Miskçi Şahin’in, kaynı Abraham’ın karısını ve mallarını alıp Yeniköy’e gittiklerine dair iddiası Sâhib-i arzuhâl Abraham zimmînin hasmı Miskçi Şahin nâm Ermeni dîvân-ı hazret-i sadrazamîde ma‘kūd-ı meclis-i şer‘de mesfûr Abraham kaynım olmağla anası Kömü ve kız karındaşı Kohan nâm Nasrâniyeler ile on yedi ay mukaddem mahmiye-i İstanbul’da Çoban Çavuş mahallesinde vâki‘ menzilime gelip ben menzilimde yoğiken zevcem Lalik Nasrâniyeyi idlâl ve iğfâl ve menzilimde mevcûde mâlım olan sekiz bin altı yüz yetmiş beş guruşluk ber-mûceb-i defter nakid ve eşyâ-i ma‘lûmemi mezbûrûn bi-gayr-ı hakkın ahz ve zevcem mezbûr ile mahrûse-i Galata kazâsına tâbi‘ Yeniköyde vâki‘ menzillerine götürüp ol târîhden beri zevcemi ve mâlımı vermeyip bana gadr etmişlerdir deyü mezbûr Abraham’dan taleb ve da‘vâ ol dahi cevâbında mesfûr Şahin’in zevcesi kız karındaşı Yeniköy’de sâkine olduğunu ikrâr lâkin ber-vech-i muharrer mezbûr Şahin’in ol mikdâr mâlını ahz eylediklerini bi’l-külliye inkâr etmekle müdde‘î-i merkūm Miskçi Şahin defter-i mezkûr nâtık olduğu üzere müdde‘âsını beyân için işbu târîh-i i‘lâm senesi Şevvâlü’l-mükerreminin on beşinci günü Şahin’e havâle olunduğu fermân-ı âlîlerine imtisâlen huzûr-ı âlîlerine i‘lâm olundu. Fî 24 min-Zilhicce sene 1152.