Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 414 Hüküm no: 468 Orijinal metin no: [64a-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eski nalçacılar kethüdası Mehmed’in nalçacılar ve nalburlar esnafında alacağı olduğu yolundaki davasından vazgeçtiği Bâ-mühr-i efendi Ma‘rûz Mahmiye-i İstanbul’da nalçacı esnafının sâbık kethüdâları olan Mehmed nâm kimesne meclis-i şer‘de esnaf-ı mezkûrenin hâlâ kethüdâsı Halil ve yiğitbaşısı Ahmed ve ehl-i hıbreleri Mustafa ve du‘âcıları Mehmed Efendi ile neferâtdan yirmi iki nefer Müslim ve on nefer zimmîler ve nalburlar esnafı kethüdâsı Hasan ve neferâtdan mazbûtü’l-esâmî Müslimîn muvâcehelerinde gerek hâzırûn bi’l-meclis ve gerek gāibûn ani’l-meclis esnaf-ı merkūme zimmetlerinde cihet-i şer‘iyyeden yüz bir buçuk guruş hakkım vardır deyü eylediğim da‘vâmdan rızâm ile fâriğ olup meblağ-ı mezbûra ve gayre müte‘allıka âmme-i da‘vâdan hâzırûn-ı merkūmûn ve gāibûn-ı mezbûrûnun zimmetlerini ibrâ-i âm ile ibrâ ve ıskāt eyledim ba‘de’l-yevm zikr olunan kethüdâlıklarına ve sâir umûrlarına vechen mine’l-vücûh müdâhale etmemek üzere ta‘ahhüd eyledim deyip hâzırûn-ı mezbûrûn dahi ibrâ-i mezbûru kabûl edip kat‘-ı nizâ‘ eyledikleri bi’l-iltimâs huzûr-ı âlîlerine i‘lâm olundu. Fî 26 min-Zilhicce sene 1152.