Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 417 Hüküm no: 473 Orijinal metin no: [64b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saliha Hatun’un, kocası Hüseyin’den boşanırken zimmetini ibra ettiğinden para talebinde bulunamayacağı Ma‘rûz Zâtı ta‘rîf-i şer‘î ile mu‘arrefe olan sâhibe-i arzuhâl Mahkeme-i Bâb’da meclis-i şer‘de derûn-ı arzuhâlde mezkûrü’l-ism zevc-i sâbıkı Hüseyin mahzarında merkūm Hüseyin ile zevciyet beynimizde kāime iken merkūm Hüseyin’e mâlımdan on guruş ikrâz ve teslîm ol dahi ber-vech-i muharrer iktirâz ve tesellüm etmekle hâlâ meblağ-ı mezbûru merkūm Hüseyin’den taleb ederim [deyü] da‘vâ eyledikde ol dahi cevâbında târîh-i i‘lâmdan otuz iki gün mukaddem Davud Paşa Nâibi Ahmed Efendi huzûrunda mezbûre Saliha Hatun’a üç bin üç yüz mehr-i müecceli ve nafaka-i iddet-i mu‘ayyene-i ma‘lûmesi üzerlerine ve me’ûnet-i süknâsı dahi kendi üzerine olmak üzere benimle ber-nehc-i şer‘î hul‘ olduğunda ben dahi ber-vech-i muharrer hul‘-i mezbûru ba‘de’l-kabûl hukūk-ı zevciyete ve müdde‘âsı olan meblağ-ı mezbûr on guruş mutâlebesine müte‘allıka âmme-i da‘vâdan benim zimmetimi ibrâ ve ıskāt eyledi deyü ba‘de’d-def‘ ve’l-inkâr merkūm Hüseyin ber-vech-i mübeyyen def‘-i mezkûrunu İmâm Mehmed Efendi b. Mehmed ve Abdullah Efendi b. Osman ve Molla Mustafa b. Derviş ve Halil b. Mustafa nâm şuhûd-ı udûlle mezbûre Saliha Hatun muvâcehesinde vech-i şer‘î üzere isbât etmeğin mûcebince müdde‘iye-i mezbûre Saliha Hatun’dan bî-vech mu‘ârazadan men‘ olunduğu huzûr-ı âlîlerine i‘lâm. Bâkī fermân men-lehü’l-emrindir. 25 Zilhicce sene 1152.