Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 416 Hüküm no: 472 Orijinal metin no: [64b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abaza memleketlerinden esir alınması yasak olduğundan, Çolak Süleyman’ın esir aldıklarını iade ettiği ve bir daha yapmayacağını taahhüd ettiği Bâ-mühr-i efendi Ma‘rûz Hâlâ Faş Kalesi Muhâfızı Mehmed Paşa hazretleri tarafından derûn-ı arzda mastûr husûsa memûr olan Osman Ağa b. el-Hâc Hasan meclis-i şer‘de sefîne reislerinden olup yine derûn-ı arzda mastûrü’l-ism Çolak Süleyman b. el-Hâc Hasan muvâcehesinde bundan akdem Abaza mülkü ve sâir Abaza iskeleleri beyleri Der-i devlet-medâra arz-ı ubûdiyet ve kabûl-i itâ‘at etmeleriyle beylikleri ve tasarrufunda olan kurâ ve arâzi ve ra‘iyyetleri berât-ı âlîşân ve fermân-ı celîlü’l-ünvân ile tasarruflarında ibkā ve memleketleri memâlik-i mahrûseye ilhâk olunmağla min-ba‘d Abaza memleketi re‘âyâsına ta‘arruz ve seby ve istirkāk olunmak memnû‘ iken mezbûr Çolak Süleyman hilâf-ı şer‘ on iki nefer re‘âyâyı derûn-ı arzda mezkûr Soğuksu İskelesi’nde der-zincir ve seby ve istirkāk ve ahz etmişdir dedikde mezbûr Süleyman cevâbında ber-vech-i muharrer ahz eylediğim ancak on nefer re‘âyâ olup dokuz neferini Çerkes İskelelerinden Soça [Soçi] nâm mahalde bir kimesnenin yedine teslîm etmiş idim deyü ikrâr ve hâlâ yedinde mevcûd olan bir neferini dahi merkūm Osman Ağa’nın yedine def‘ ü teslîm ve zikr olunan dokuzunu dahi mahall-i mezbûrdan memleketlerine îsâl ve min-ba‘d ber-minvâl-i muharrer re‘âyâ-yı mezkûreye aslâ ta‘arruz ve müdâhale etmemek üzere ba‘de’t-ta‘ahhüd husûs-ı mezbûr için paşa-i mûmâ-ileyhin masrûfâtı olan iki yüz guruşu dahi kendi mâlından teberru‘an paşa-i mûmâ-ileyhe îsâl için merkūm Osman Ağa’ya teslîm edip kat‘-ı nizâ‘ eyledikleri bi’l-iltimâs huzûr-ı âlîlerine i‘lâm olundu. Fî 27 min-Zilhicce sene 1152.