Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 420 Hüküm no: 480 Orijinal metin no: [65a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ölmüş olan Anton’un varislerinin tereke konusundaki davalarına sulh bedeli karşılığı son verildiği Bâ-mühr-i efendi Ma‘rûz Derûn-ı arzuhâlde mastûrü’l-ism Anton nâm hâlikin verâseti zevcesi Kadar ve kebîre kızları Halofye ve Nazlı ile li-ebeveyn er karındaşı Mosis ve kız karındaşı Meryem’e münhasıra ba‘dehû mezbûr Mosis dahi hâlik olup verâseti kebîr oğlu Yamandi’ye ol dahi hâlik olup verâseti zevcesi Palasan ile kebîr oğulları Ohan ve Vasil ve sagīr oğlu Yorgaki ve sagīre kızları Damlatsa ve Maryore’ye ba‘de’l-inhisar mesfûr Meryem’in vekîl-i sâbitü’l-vekâlesi Melkon zimmî meclis-i şer‘de sıgār-ı mezbûrenin vasiyesi ve anaları olan mesfûre Palasan ile mesfûr Vasil’in vekîl-i sâbitü’l-vekâleleri Avakin nâm zimmî ile mesfûr Ohan muvâcehelerinde müvekkilem mezbûre hâlik ol mezbûrun terekesinden hissesini bedel-i ma‘lûm-ı makbûza alâ-tarîkı’t-tehârüc sulh olunmuş idi, lâkin bedel-i mezkûr nukūd, terekeden hissesine isâbet eden mikdârdan ekal olmağın sulh-ı mezbûr sahîh olmaz deyü bi’l-vekâle eylediği da‘vâsından üç yüz elli guruş üzerine vekîl-i mezbûr Avakin ve asîl-i merkūm Ohan ile vech-i şer‘î üzere sulh ve bedel-i sulh-ı mezkûru ancak kibâr-ı veresenin mâllarından ahz u kabz ve âmme-i da‘vâdan verese-i mezkûrûnun zimmetlerini bi’l-vekâle ibrâ ve ıskāt edip kat‘-ı nizâ‘ eyledikleri huzûr-ı âlîlerine i‘lâm olundu. Fî 28 min-Zilhicce sene 1152.