Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 423 Hüküm no: 488 Orijinal metin no: [65b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Süleyman’ın Fatıma’ya olan borcunu ödemesi Ma‘rûz Mumcu Mehmed Beşe mübâşeretiyle Bâb Mahkemesi’ne ihzâr olunan Süleyman’ın hasmı Fâtıma nâm hatun zâtı ba‘de’t-ta‘rîfi’ş-şer‘î meclis-i şer‘de mezbûr Süleyman mahzarında mezbûr Süleyman zimmetinde cihet-i karz-ı şer‘îden on beş guruş hakkım olmağla taleb ederim deyü da‘vâ eyledikde ol dahi ikrâr lâkin tamâmen kendüye def‘ ü teslîm eyledim deyü ba‘de’d-def‘ ve’l-inkâr mezbûr Süleyman def‘-i mezkûrunu beyâna kādir olmayıp talebiyle mezbûre Fâtıma’ya vech-i şer‘î üzere yemîn verilmeğin mûcebince meblağ-ı mezbûr on beş guruşu müdde‘iye-i mezbûre Fâtıma’ya edâ ve teslîme merkūm Süleyman’a tenbîh olunduğu huzûr-ı âlîlerine i‘lâm olundu. Fî-gurreti Muharremi’l-harâm sene 1153.