Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 423 Hüküm no: 487 Orijinal metin no: [65b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Avanes’i bıçaklayarak ölmesine sebep olan Manok’un, maktülün kardeşi Marat’ın talebiyle kısasına karar verildiği Ma‘rûz Mahmiye-i İstanbul’da Mercan Hanı’nda mütemekkin iken bundan akdem katîlen hâlik olan Avanes v. Miftar v. Haçok nâm zimmînin işbu hâzır bi’l-meclis Marat zimmî li-ebeveyn er karındaşı olup babaları ismi Mikitar ve dedeleri ismi Haçok ve anaları ismi Gül bt. Kasber ve maskat-ı re’sleri Van kazâsında Parnis nâm karye olmağla usûbet-i nesebiye cihetinden hasren vârisi olduğu lede’t-tezkiye şehâdetleri makbûle olduğu mütehakkık olan karye-i mezbûre ahâlîsinden ve mahmiye-i mezbûrede müsâfiren sâkinler olan Abdurrahman b. Halid nâm kimesne ile Ohan v. Avanes ve Avanes v. Mankar nâm zimmîler şehâdetleriyle mahzar-ı hasm-ı câhid-i câi’z-zikrde şer‘an ba‘de’s-sübût ve’l-hükm mesfûr Marat Bâb Mahkemesi’nde Mumcu Mustafa Beşe mübâşeretiyle meclis-i şer‘a ihzâr olunan Manuk v. Kirkor nâm zimmî muvâcehesinde merkūm Manuk mezbûr Avanes’i işbu târîh-i i‘lâmdan üç gün mukaddem zikr olunan Mercan Hanı’nın taş nerdübanı başında siyâh kabzalı kebîr Tophane bıçağı ta‘bîr olunur âlet-i câriha ile beyne’s-salâteyn boynunun sol tarafının şah damarından bi-gayr-ı hakkın amden bir yerinden darb ve cerh edip ol anda mezbûr Avanes cerh-i mezkûrdan müteessiren hâlik olmağla mûcib-i şer‘îsini taleb ederim deyü da‘vâ, merkūm Manuk dahi cevâbında mezbûr Avanes’i ber-minvâl-i muharrer zikr olunan âlet-i câriha ile sol şah damarından bi-gayr-ı hakkın amden bir yerinden darb ve cerh edip mezbûr Avanes cerh-i mezkûrdan müteessiren hâlik olduğunu bi’t-tav‘i’s-sâf kirâren ve mirâren ikrâr ve i‘tirâf etmeğin mûcebince müdde‘î-i mezbûr Marat zimmînin talebiyle merkūm Manuk zimmînin kısâsına hükmolunduğu huzûr-ı âlîlerine i‘lâm olundu. Fî 29 min-Zilhicce sene 1152.