Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 425 Hüküm no: 492 Orijinal metin no: [65b-8] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mumcu Aleksi’nin yanında çalışan Vasil ve Nikola’ya ücretlerini ödediği Bâ-mühr-i efendi Derûn-ı arzuhâlde mezkûrü’l-ism Mumcu Aleksi nâm zimmîden hasmı Vasil nâm zimmî meclis-i şer‘de târîh-i i‘lâmdan on iki sene mukaddem zimmetinde sekiz ay kendüye eylediğim hizmetimin ücreti olan altmış beş guruş hakkımı taleb ederim deyü da‘vâ ve âhar hasmı Nikola dahi yine mesfûr Aleksi’ye târîh-i i‘lâmdan dört sene mukaddem sekiz ay eylediğim hizmetimin ücreti olan kırk beş guruş hakkımı taleb ederim deyü da‘vâ eylediklerinde ol dahi ikrâr lâkin bi’t-tamâm kendülere ücret-i mezkûrelerini ba‘de edâi’l-hizmet edâ ve teslîm eylediğimde onlar dahi bi’t-tamâm ahz ü istîfâ edip husûs-ı mezkûra ve gayre müte‘allıka âmme-i da‘vâdan benim zimmetimi ibrâ ve ıskāt eylediler deyü ba‘de’d-def‘ ve’l-inkâr mesfûr Aleksi ber-vech-i muharrer def‘-i mezkûrunu udûlden İsmail ve Hüseyin ve Bektaş ve el-Hâc Mehmed ve İbrahim ve diğer Hüseyin ve Mehmed Beşe nâm kimesneler ile Esteryo ve Anaştaş ve diğer Esteryo ve Kosta nâm zimmîler şehâdetleriyle bi’l-muvâcehe vech-i şer‘î üzere isbât etmeğin mûcebince müdde‘iyân-ı mezbûrân ber-vech-i muharrer mu‘ârazadan men‘ olunduğu huzûr-ı âlîlerine i‘lâm olundu. Bâkī emr ü fermân hazret-i veliyyü’l-emrindir. Fî 3 min-Muharremi’l-harâm sene 1153.