Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 426 Hüküm no: 496 Orijinal metin no: [66a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ardarda birkaç kişiye satılan cariyenin hürriyetini ispat etmesinden sonra satanların bir öncekinden paralarını talep etmesi Bâ-mühr-i efendi Ma‘rûz Sâhib-i arzuhâl Hacer bt. el-Hâc Ali b. Abdullah nâm hatunun husûs-ı âtîde tarafından vekîl olduğu şâhideyn-i âdileyn ile şer‘an sâbit olan es-Seyyid İsmail muvâcehesinde hasmı el-Hâc Ali müvekkile-i mezbûre bundan akdem yedinde câriye-i memlûkemdir deyü semen olmak üzere yedinden makbûzu olup istihlâk eylediği nakid elli guruş ile mecmû‘u iki yüz guruş kıymetli bir Tarsus? şal ve telli ve sade otuz iki zirâ‘ hatâî ve iki vakıyye od ve dört değirmi yemenî ve iki işleme âbdest makraması ve iki yağlık ve iki Mısır makraması mukābelesinde bana bey‘ ben dahi ba‘de’l-iştirâ gāib ani’l-meclis Hazînedâr Memiş Ağa b. Abdullah’a ol dahi Mirâhur diğer el-Hâc Ali Ağa’ya semen-i ma‘lûma bey‘ ol dahi ba‘de’l-iştirâ zevcesi Zeliha’ya temlîk eylediği Ümmügülsüm bir kıt‘a hüccet nâtıka olduğu üzere mezbûre Zeliha’nın yedinde iken hürretü’l-asl olduğunu şuhûd-ı udûlle isbât ve hükm ve sebîlim tahliye ve her biri âhardan semenini ba‘de’l-mürâca‘a ben dahi semen deyü müvekkile-i mezbûreye medfû‘um olan meblağ-ı mezbûru müvekkile-i merkūmeden bi’l-mürâca‘a taleb eylediğimde ol dahi bana câriye-i memlûkesi olmak üzere bey‘ eylediği mezbûre Ümmügülsüm’ün ber-vech-i muharrer isbât eylediğini mezbûre Ümmügülsüm’ün ber-vech-i muharrer isbât-ı hürriyet eylediğini ve semen-i mezkûr cihet-i merkūmeden bana deyni olduğunu şuhûd mahzarında ikrâr ve i‘tirâf-unvânıyla yedime temessük dahi vermekle hâlâ meblağ-ı mezbûru müvekkile-i merkūmeden bi’l-mürâca‘a taleb ederim deyü ba‘de’d-da‘vâ ve’l-inkâr müdde‘î-i mezbûr müdde‘âsına getirdiği bir kimesne edâ-i şehâdet eylemeyip makbûlü’ş-şehâde olmamağla müdde‘î-i mezbûr şâhid-i âhara havâle olunup işbu târîh-i i‘lâmdan iki ay mukaddem mazbût olduğu fermân-ı cihân-mutâ‘larına imtisâlen huzûr-ı âlîlerine i‘lâm olundu. Fî 5 min-Muharrem sene 1153.