Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 428 Hüküm no: 499 Orijinal metin no: [66a-7] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatıma Hatun’un, Rukiye, Mehmed Aziz Efendi ve Arab Habibe tarafından bazı eşyalarının alındığına dair iddiasını ispatlayamadığı Bâ-mühr-i efendi Ma‘rûz Zâtı ta‘rîf-i şer‘î ile mu‘arrefe olan Fâtıma nâm hatun meclis-i şer‘de fahrü’l-muhadderât Rukiye Hanım bt. el-merhûm el-mebrûr Mestcizâde Abdullah Efendi tarafından husûs-ı âti’l-beyânda vekîl-i sâbitü’l-vekâlesi fahrü’l-kuzât Mustafa Efendi ile müvekkile-i merkūmenin oğlu Mehmed Aziz Efendi ve zâtı ta‘rîf-i şer‘î ile mu‘arrefe olan Arab Habibe muvâcehelerinde bundan akdem mâlımdan beş aded fındık altını ve on aded Mısır zincirlisi ve on aded zer-i mahbûb nısfiyesi ve on cedîd guruş ve dört guruşluk para ve mecmû‘u iki yüz guruş kıymetli sandal kaplı bir sincab kürk ve beş gömlek ve beş don ve iki çintiyân ve iki çuka cübbe ve on top bez ve otuz zirâ‘ iplik ve üç anterimi bi-gayr-ı hakkın mezbûrûn Rukiye ve Mehmed Aziz Efendi ve Arab Habibe ahz eylediler taleb ederim deyü ba‘de’d-da‘vâ ve’l-inkâr müdde‘iye-i mezbûre müdde‘âsını isbât eylemeyip bi’t-taleb mezbûrân Mehmed Aziz Efendi ve Arab Habibe tahlîf olundukdan sonra müvekkile-i mezbûre Rukiye Hanım dahi mahallinde ba‘de’t-tahlîfi’ş-şer‘î mûcebince müdde‘iye-i mezbûre ber-minvâl-i muharrer bilâ-beyyine bî-vech-i şer‘î mu‘ârazadan men‘ olunduğu huzûr-ı âlîlerine i‘lâm olundu. Fî 5 min-Muharremi’l-harâm sene 1153.