Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 431 Hüküm no: 506 Orijinal metin no: [66b-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şahrab’ın babasından kendisine kaldığını iddia ettiği basmacı gediğinin Atam ve Karabet’e ait olduğu Bâ-mühr-i efendi Ma‘rûz Sâhib-i arzuhâl Şahrab nâm zimmî meclis-i şer‘de basmacı tâifesinden Atam v. Ohan nâm zimmî muvâcehesinde tâife-i mezbûreden olup bundan akdem hâlik olan babam Ayvaz nâm zimmî mahmiye-i İstanbul’da Langa Yenikapısı hâricinde vâki‘ basmacı kârhânesinde hırfet-i mezkûre beynlerinde mu‘teber olan gedik ta‘bîr olunur âlât ve eşyâ-i ma‘lûmeye hayâtında mutasarrıf olup ba‘de’l-helâk ber-vech-i mu‘tâd ben oğlu olduğum ecilden bana verilmesi iktizâ etmiş iken zikr olunan gediği mesfûr Atam hilâf-ı mu‘tâd kabz ve tasarruf eyledi dedikde mesfûr Atam dahi hâlik-i mesfûr Ayvaz’ın aslâ alâka ve medhali olmayıp sâlifü’z-zikr gedik-i mesfûr Şahrab’ın ammisi ve Dalot nâm zimmînin tasarrufunda olup ol dahi keff-i yed ve bana rızâsıyla teslîm ben dahi ahz ve kabûl ve hâzır bi’l-meclis Karabet zimmîyi kethüdâ ve yiğitbaşı ve sâir hırfet-i mezbûre ustaları ma‘rifetleriyle kendime şerîk eyledim dedikde hırfet-i mezkûre Kethüdâ Mehmed ve Yiğitbaşı Ahmed ve sâir mazbûtü’l-esâmî Müslimîn mesfûr Atam’ın takrîr-i meşrûhu vâkı‘a mutâbık ve nefsü’l-emre muvâfık olup zikr olunan gedik mesfûrân Atam ve Karabet’in ale’l-iştirâk tasarruflarındadır deyü bi’l-ittifâk haber verdikleri huzûr-ı âlîlerine i‘lâm olundu. Fî 7 min-Muharremi’l-harâm sene 1153.