Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 432 Hüküm no: 508 Orijinal metin no: [66b-8] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Molla Hasan’ın Gamzegâh Hatun’a olan borcunu ödemesi Ma‘rûz Zâtı ta‘rîf-i şer‘î ile mu‘arrefe olan Gamzegâh bt. Abdullah nâm hatun Mahkeme-i Bâb’da meclis-i şer‘de Molla Hasan b. İbrahim mahzarında mezbûr Molla Hasan zimmetinde ber-mûceb-i temessük kırk altı guruş hakkım olmağla meblağ-ı mezbûru merkūm Molla Hasan’dan taleb ederim deyü da‘vâ eyledikde mezbûr Molla Hasan dahi meblağ-ı mezbûrun kırk guruşunu ikrâr ziyâde altı guruşunu inkâr etmeğin mûcebince mezbûr Molla Hasan’ın ikrârı olan kırk guruşu müdde‘iye-i mezbûre Gamzegâh Hatun’a edâ ve teslîme mezbûr Molla Hasan’a ba‘de’t-tenbîh müdde‘iye-i mezbûre ber-vech-i muharrer altı guruş ziyâde müdde‘âsı beyâna havâle olunduğu huzûr-ı âlîlerine i‘lâm olundu. Fî 8 Muharrem sene 1153.