Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 438 Hüküm no: 521 Orijinal metin no: [68a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çamaşırcı esnafının, kethüdaları Mehmed b. Ali’den razı oldukları İstanbul’da vâki‘ çâmeşûycu esnafından ashâb-ı arzuhâlden Ömer b. el-Hâc Hüseyin ve Hüseyin b. Ali ve Hüseyin b. Mehmed nâm kimesneler Bâb Mahkemesi’nde meclis-i şer‘de bâ-berât-ı âlîşân hâlâ kethüdâları olan es-Seyyid Mehmed b. Ali’den mezbûr es-Seyyid Mehmed iktizâ eden umûrumuza bizi karışdırmayıp kendi rü’yet eder deyü eyledikleri da‘vâları meşrû‘ olmayıp ve esnaf-ı mezbûr erbâbından müseccelü’l-esâmî yüz nefer Müslim ve zimmîler hâlâ kethüdâmız olan mezbûr es-Seyyid Mehmed’in evzâ‘ ve etvârından cümlemiz hoşnûd ve râzılarız ve mezbûr es-Seyyid Mehmed esnaf-ı mezbûrun iktizâ eden umûrunu cümle re’yi ve ma‘rifetleriyle rü’yet eder ve cümlemiz mezbûr es-Seyyid Mehmed’in kethüdâlığını isteriz deyü mezbûrun hüsn-i hâlini haber verdiklerinde mezbûr es-Seyyid Mehmed dahi fîmâ-ba‘d esnaf-ı mezbûrun iktizâ eden umûrunu ihtiyârları ma‘rifetleriyle rü’yet eyleyip nizâmlarına mugāyir vaz‘ u hareket etmemek üzere ta‘ahhüd ettikde mezbûrûn Hüseyin ve diğer Hüseyin ve Ömer ve sâirleri râzılar olup bu vechile kat‘-ı nizâ‘ ettikleri huzûr-ı âlîlerine i‘lâm olundu. Fî 13 min-Muharremi’l-harâm sene 1153.