Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 439 Hüküm no: 522 Orijinal metin no: [68a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sadır olan ferman gereğince Kıbtîlerin birbirlerine kefil olduklarının tescil edildiği Ma‘rûz Kıbtîler i‘lâmıdır Dîvân-ı âlî çavuşlarından mühtedî Mustafa Çavuş kulları yediyle vârid olan fermân-ı cihân-mutâ‘larına imtisâlen savb-ı şer‘-i enverden irsâl olunan Feyzullah Efendi dâ‘îleri mahmiye-i İstanbul’da Büyük Karaman ve Avratpazarı ve Balat ve Topkapısı ve Yedikule havâlîsinde mütemekkin Kıbtî tâifesinin ale’l-infirâd esâmîlerin tahrîr ve maktû‘ veren iki yüz yetmiş dokuz nefer Kıbtiyân birbirlerine ve onlara dahi çeribaşıları Mustafa ve Ahmed ve Ali ve onlara dahi hâlâ cizyedârları Abdullah Ağa kulları zikr olunan fermân-ı âlîşân mantûkunca kefîl olduklarını ba‘de’t-tescîl tâife-i mezbûreden esâmeleri defter olunan yirmi dört nefer Kıbtiyân dahi bizler Cebehâne-i âmire umûruna memûriyetimiz hasebiyle bu âna dek maktû‘ verdiğimiz yokdur deyüp yüz sekiz nefer dahi ber-mûceb-i fermân maktû‘dan mu‘âfiyet iddi‘âsında olup mârrü’z-zikr Kıbtiyân’dan hâric Topkapısı dâhilinde Bayezid Ağa mahallesinde sâkinler olup ehl-i perde olmayan elekci ve kalburcu ve tarakcı cem‘an altmış altı neferi bizler Erâmine cinsinden hâlâ mühtedî ve Müslim ve on neferi Erâmine keferesi cinsinden zimmîler olup Kıbtî değilleriz dediklerini mübâşir-i mezbûr Mustafa Çavuş kullarıyla kâtib-i merkūm dâ‘îleri meclis-i şer‘a gelip inhâ ve takrîr eyledikleri Bâb Mahkemesi’nde tescîl [ve] huzûr-ı âlîlerine i‘lâm olundu. El-emru li-men-lehü’l-emr. Fî 13 min-Muhurremi’l-harâm sene 1153.