Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 446 Hüküm no: 538 Orijinal metin no: [69a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Efendi’nin uygunsuz hallerinden dolayı mahalleden çıkarılması Ma‘rûz İstanbul’da Voynuk Şücâ‘ mahallesi imâmı Mehmed Bahtî Efendi ve ahâlîsinden el-Hâc Mustafa Efendi ve el-Hâc Abdullah Efendi ve el-Hâc Halil ve el-Hâc Abdullah ve Mustafa ve Mahmud ve sâirleri Bâb Mahkemesi’nde meclis-i şer‘de ihzâr ettirdikleri el-Hâc Mustafa Efendi muvâcehesinde mezbûr el-Hâc Mustafa Efendi mahallemizde sâkin olup lâkin ba‘zımıza lisânıyla cevr ü ezâ ve ba‘zımızı dahi ta‘cîz ve tekdîr ve rencîde vü remîde eylediğinden gayrı sû-i hâl üzere olmağla mezbûr el-Hâc Mustafa Efendi’den bir vechile emniyetimiz yokdur deyü mahalle-i merkūmeden hurûcuna tenbîh olunmak matlûbumdur deyü teşekkî eylediklerinde mezbûr el-Hâc Mustafa Efendi dahi târîh-i i‘lâmdan üç gün tamâmına değin rızâsıyla mahalle-i merkūmeden hurûca müte‘ahhid oldukda onlar dahi râzılar olup bu vechile kat‘-ı nizâ‘ ettikleri huzûr-ı âlîlerine i‘lâm olundu. Fî 21 min-Muharremi’l-harâm sene 1153.