Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 446 Hüküm no: 539 Orijinal metin no: [69a-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun’un evinin üstüne sonradan yaptırdığı tahtabendlerin komşuları rahatsız etmesinden dolayı yıkılıp daha uygun yere yapılması Keşf Bâ-mühr-i efendi Ma‘rûz Sâdır olan fermân-ı âlîlerine imtisâlen kıbel-i şer‘den irsâl olunan keşif nâibi Hıfzı el-Hâc Mehmed Efendi dâ‘îleri ve bi’l-fi‘il hâssa mimârbaşısı olan izzetlü el-Hâc Mehmed Ağa ve hulefâsından Halil Halîfe ile İstanbul’da Süleymaniye kurbünde Devoğlu mahallesinde vâki‘ merhûm Siyavuş Paşa Evkāfı’ndan sâhib-i arzuhâl el-Hâc Mehmed Ağa’nın tasarrufunda olan menziline varıp huzûr-ı Müslimînde akd eylediği meclis-i şer‘de yine vakf-ı mezbûrdan câr-ı mülâsıkı olup bir bâb menzile mutasarrıfa olan derûn-ı arzuhâlde mezkûretü’l-ism Âişe Hatun tarafından zevci ve vekîl-i sâbitü’l-vekâlesi Ömer muvâcehesinde vakf-ı mezbûr mütevellîsi Abdülhalim Bey hâzır olduğu halde mezbûre Âişe Hatun bundan akdem menzili ve üzerinde olan tahta-bendini hedm eyledikde menzilini binâ ve üzerinde olan tahta-bend-i mezkûru binâ etmeyip yüz kırk dokuz senesi[nde] ben sefer-i hümâyûnda iken mezbûr Âişe Hatun vaz‘-ı kadîmini tağyîr birle tahta-bendi ihdâs ve benim makarr-ı nisvân olan mahallerime nezâreti ve hudûsü dahi hilâf-ı fermân-ı âlî olmağla mu‘âyene olunup zarâr-ı şer‘îsi men‘ ve hedm olunmak matlûbumdur deyü ba‘de’d-da‘vâ ve’l-mu‘âyene zarâr-ı şer‘îsi müte‘ayyen oldukdan sonra tavassut-ı muslihîn ile zikr olunan tahta-bendi müdde‘î-i mezbûr el-Hâc Mehmed kendi mâlıyla bi’t-terâzi üç zirâ‘ ilerisine iki kat tahta perde ile binâ etmek üzere kat‘-ı nizâ‘ eylediklerin mevlânâ-yı mezbûr mahallinde ketb ve ümenâ-i şer‘le meclis-i şer‘a gelip ba‘de’l-inhâ huzûr-ı âlîlerine i‘lâm olundu. Fî 19 min-Muharremi’l-harâm sene 1153.