Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 453 Hüküm no: 554 Orijinal metin no: [70a-7] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa, Ahmed ve diğer Mustafa’ya borcu olan Mustafa’nın, borcunu taksitle ödeyeceği Ma‘rûz Sâhib-i arzuhâl Mustafa’dan Mahkeme-i Bâb’da meclis-i şer‘de Ali b. Mustafa nâm kimesne Selanik keçesi akçesinden elli guruş ve es-Seyyid Ahmed nâm kimesne dahi cihet-i deyn-i şer‘îden seksen guruş ve es-Seyyid Mustafa nâm kimesne dahi ma‘lûmü’l-mikdâr penbe akçesinden yirmi beş guruş mezbûr Mustafa zimmetinde hakkımız vardır taleb ederiz deyü da‘vâ eylediklerinde ol dahi her birine ber-vech-i muharrer deyni olduğunu ikrâr lâkin def‘aten edâ-i deyne kudretim olmayıp işbu üzerimde lâbis olduğum köhne libâsımdan mâ‘adâ ism-i mâl ıtlâk olunur bir nesneye mâlik değilim deyü fakr u asâr etmekle hâlâ mezbûr Mustafa’nın iddi‘âsı üzere olduğunu İstanbul’da Kürkçübaşı mahallesi imâmı Mehmed Efendi b. Mustafa ve Mahmud b. Mehmed ve İbrahim b. Mehmed ve Hasan b. Mehmed nâm kimesneler mezbûr Mustafa’nın ber-vech-i muharrer müdde‘iyûn-ı mezbûrûn muvâcehelerinde asârını ihbâr ettiklerinde müdde‘iyûn-ı mezbûrûn dahi merhamet edip kendülere beher mâh guruş başına birer akçe vermek üzere tecîl ve taksît eylediklerinde mezbûr Mustafa dahi râzı olup ber-vech-i muharrer târîh-i i‘lâmdan müddet-i ma‘lûme tamâmına değin meblağ-ı mecmû‘-ı mezbûru mukassatan edâya ta‘ahhüd eylediği huzûr-ı âlîlerine i‘lâm olundu. Fî 25 Muharrem sene 1153.