Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 459 Hüküm no: 564 Orijinal metin no: [71a-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Haseki’nin Hamza ve Abdullah’a olan borcunu taksitle ödeyeceği Ma‘rûz Sâhib-i arzuhâl Mehmed Haseki Bâb Mahkemesi’nde meclis-i şer‘de Bostânî Hamza b. Abdullah nâm kimesneye cihet-i deyn-i şer‘îden sekiz yüz guruş ve Abdullah b. Mehmed nâm kimesneye kezâlik cihet-i deyn-i şer‘îden altı yüz guruş ki cem‘an mezbûrâna zimmetinde bin dört yüz guruş deyni olduğunu mezbûrân muvâcehelerinde ba‘de’l-ikrâr lâkin meblağ-ı mezbûru hâlâ ve def‘aten edâya iktidârı olmayıp tecîl ve taksîte tâlib olduğunda mezbûrân dahi beher şehr guruş başına birer akçe verip târîh-i i‘lâmdan yüz yirmi ay tamâmına değin meblağ-ı mecmû‘-ı mezkûru kendülere tamâmen edâ ve teslîm etmek üzere merkūm Mehmed Haseki’yi tecîl ve taksît eylediklerinde ol dahi kabûl ve ber-vech-i muharrer meblağ-ı mecmû‘-ı merkūmu müddet-i mezkûre tamâmında mezbûrân edâya ta‘ahhüd ve iltizâm eyledim deyü ikrârı ba‘de’t-tasdîk ve’t-tescîl huzûr-ı âlîlerine i‘lâm olundu. Fî-selhi Muharremi’l-harâm sene 1153.