Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 464 Hüküm no: 575 Orijinal metin no: [72a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun’un evinin lağım yoluyla ilgili anlaşmazlıkta sulh sağlandığı Keşf Ma‘rûz Sâdır olan fermân-ı âlîlerine imtisâlen cânib-i şer‘-i mutahharadan irsâl olunan keşif nâibi Hıfzı el-Hâc Mehmed Efendi dâ‘îleri hâssa mimârı hulefâtından İbrahim ve Halil halîfeler ile mahmiye-i İstanbul’da Kâtibkasım mahallesinde vâki‘ mahall-i nizâ‘ın üzerine varıp akd olunan meclisde sâhibe-i arzuhâl Âişe Hatun meclis-i ma‘kūd-ı mezkûrda câr-ı mülâsıkı olup bir bâb menzilin nısfına mutasarrıf olan derûn-ı arzuhâlde mastûrü’l-ism Yusuf ve nısf-ı âharına mutasarrıfe olan zevcesi Afife Hatun ve tarafından vekîl-i sâbitü’l-vekâlesi zevci mezbûr Yusuf muvâcehesinde târîh-i i‘lâmdan sekiz sene mukaddem işbu mu‘âyene olunan menzilimin kadîmî mezbûrenin menzili derûnundan cereyân eden kârîzimi bi-gayr-ı hakkın sed ve icrâsına mümâna‘at etmekle suâl olunup kadîmi üzere cereyân ettirmek matlûbumdur deyü ba‘de’d-da‘vâ mezbûr Yusuf cevâbında ber-vech-i muharrer sekiz sene mukaddem sed eylediğini ikrâr ve i‘tirâf eyledikden sonra tavassut-ı muslihûn ile müdde‘iye-i mezbûre Âişe Hatun’un ve ittisâlinde olan hemşîresi Fâtıma Hatun’un ve tarîk-i hâs erbâbının rızâlarıyla mezbûretânın havluları dolması duvarı dibinde mezbûr Yusuf kendi mâlıyla birbirine muttasıl iki aded kenîf binâ ve kârîzlerin sokak kapıları olan tarîk-i hâsda vâki‘ kârîze ilhâk etmek üzere bi’t-terâzi kat‘-ı nizâ‘ eylediklerini mevlânâ-yı mezbûr mahallinde ketb ü tahrîr ve ümenâ-i şer‘le meclis-i şer‘a gelip alâ-vukū‘ihi inhâ eylediği huzûr-ı âlîlerine i‘lâm olundu. Bâkī emr ü fermân men-lehü’l-emrindir. Fî 28 min-Muharremi’l-harâm sene 1153.