Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 468 Hüküm no: 583 Orijinal metin no: [72b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Camiye yakın olduğu için çıkarılan ve evi mühürlenen Saltana’ya eşyasını alması için izin verildiği Ma‘rûz Sâhib-i arzuhâl Saltana nâm Nasrâniye meclis-i şer‘de derûn-ı arzuhâlde mezkûr İbrahim Paşa Câmi‘-i şerîfi imâmı es-Seyyid Mehmed Emin Efendi ve Müezzin el-Hâc Hüseyin ve ahâlî-i mahalleden İsmail Ağa ve Mustafa Çelebi ve sâir mazbûtü’l-esâmî kimesneler mahzarlarında câmi‘-i şerîf-i mezbûra karîb mahalde Kara Kethüdâ Mehmed Efendi Vakfı’ndan bi’l-icâreteyn mutasarrıfa olduğum vakıf menzil bundan akdem ehl-i İslâm’a mahsûs olup ehl-i İslâm sâkine olagelmekle menzil-i mezbûrdan ihrâc olunmak için ahâlî-i mahalle-i mezbûre bundan akdem taraf-ı şer‘den i‘lâm ve beni ihrâc ve menzil-i mezbûrun kapısını temhîr ettirmişler idi, lâkin menzil-i mezbûrun derûnunda eşyâ-i ma‘lûme kalmağla menzil-i mezkûrun mührü taraf-ı şer‘den kat‘ ve eşyâlarım ihrâc olunmasın iltimâs ederim deyü ahâlî-i mahalleden mârrü’z-zikr kimesneler muvâcehesinde da‘vâ sadedinde oldukda mezbûrûn aslâ ve kat‘â mümâna‘at etmemek üzere ta‘ahhüd etmeleriyle mezbûre Saltana’nın hânesinin mührü kat‘ ve eşyâları kendüye teslîm olunmak iktizâ ettiği huzûr-ı âlîlerine i‘lâm olundu. Fî 3 min-Safer sene 1153.