Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 469 Hüküm no: 585 Orijinal metin no: [72b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Öldürülen Manol’a ait sanılarak borcuna karşılık kiraya verilen Kaliçeciler Hanı’ndaki odanın aslında kız kardeşi Eleni’ye ait olduğu Bâ-mühr-i efendi Ma‘rûz Bundan akdem katîlen hâlik olan Kürkçü Manol zimmînin taraf-ı mîrîye ma‘lûmü’l-mikdâr deyni olmağla mahmiye-i İstanbul’da Kaliçeciler Hanı’nın tahtânîsinde köşede vâki‘ merhûme Haseki Sultan Vakfı’na ayda altmış akçe icâre-i müeccelesi olan bir bâb kârgîr oda katîl-i mezbûrun olmak üzere taraf-ı mîrîden ba‘de’z-zabt işbu mütevellî temessükü mantûkunca yedi yüz elli guruş bedel mukābelesinde işbu hâzır bi’l-meclis Sarrâf Abram Yahûdi’ye îcâr ve bedel-i mezkûr cânib-i mîrîden deyn-i merkūm için ahz olunup lâkin zikr olunan odada katîl-i mesfûrun aslâ alâkası olmayıp kız karındaşı gāib ani’l-meclis Eleni nâm Nasrâniyenin babasından müntakil olduğu defter-i vakıfda dahi mastûr ve mukayyed olmağın bu husûs için sâdır olan fermân-ı cihân-mutâ‘larına imtisâlen mesfûr Abram mârrü’z-zikr odayı mesfûre Eleni’ye bâ-ma‘rifet-i mütevellî rızâsıyla ferâğ ve tefvîz eyledikde cânib-i mîrîye teslîm eylediği meblağ-ı mezbûr yedi yüz elli guruşu mezbûre Eleni’nin mâlından olmak üzere tarafından sâbitü’l-vekâle vekîli Simyon nâm zimmî meclis-i şer‘de mesfûr Abram’a bi’t-tamâm def‘ u deslîm ol dahi tesellüm ve ahz edip sâlifü’z-zikr bir bâb oda kemâ-fi’l-evvel defter-i vakıfda merkūm Eleni üzerine kayd olunmak üzere vakf-ı mezbûr mütevellîsine tenbîh olunduğu huzûr-ı âlîlerine i‘lâm olundu. Hurrire fî 28 min-Muharremi’l-harâm sene 1153.