Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 341 Hüküm no: 498 Orijinal metin no: [74a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Çavuş b. Veli’nin evini oğlu Ömer Çelebi’ye sattığı Mahmiye-i İstanbul’da Müftü Ali Çelebi Mahallesi’nde sâkin fahrü’l-akrân Ahmed Çavuş b. Veli mahfil-i kazâda sulbî kebîr oğlu işbu râfi‘u’l-kitâb Ömer Çelebi mahzarında bi’t-tav‘i’s-sâf ikrâr ve takrîr-i kelâm edip mahalle-i mezbûrede vâki‘ bir tarafı Karamanî Ali mülkü ve bir tarafı Çavuş Mescidi ve bir tarafı Müftü Ali Çelebi Vakfı ve bir tarafı tarîk-i âmma müntehî olup fevkānî ve tahtânî dört bâb odaları ve mahzen ve kenîfi müştemil olan mülk menzilimi cümle tevâbi‘ ve levâhıkıyla oğlum mezbûr Ömer Çelebi’ye elli bin nakd râyic fi’l-vakt fıddî akçeye bey‘-i bâtt-ı sahîh-i şer‘î ile bey‘ ve teslîm edip ol dahi minvâl-i muharrer üzere iştirâ ve kabz ve tesellüm ettikden sonra semeni olan meblağ-ı mezbûru elli bin akçeyi yedinden bi’t-tamam ve’l-kemâl ahz u kabz eyledim, menzil-i mezbûrda min-ba‘d alâka ve medhalim kalmayıp oğlum mezbûr Ömer Çelebi’nin mülk-i müşterâsı olmuşdur, keyfe mâ yeşâ’ ve yehtâr mutasarrıf olsun dedikde gıbbe’t-tasdîk ve’t-taleb mâ-vaka‘a ketb olundu. Fi’l-yevmi’s-sâbi‘ aşer min-Zilka‘deti’ş-şerîfe li-sene erba‘a ve sittin ve elf. Şuhûdü’l-hâl: İbrahim Beşe b. Ramazan, Ali Beşe b. Hüseyin, Abdurrahman Beşe b. Hüseyin, İbrahim Ağa el-cündî, İbrahim Çelebi b. Mehmed, Mustafa Beşe b. Yusuf, Halil Beşe b. Mustafa çukadâr, Pîrî Beşe b. Hüseyin, Mehmed Çelebi b. Hüseyin, Rıdvan b. Abdullah ve gayruhum.