Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 475 Hüküm no: 598 Orijinal metin no: [73b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Miskçi Şahin’den mahallelinin rahatsız olması sebebiyle mahalleden gönderildiği Ma‘rûz Sâdır olan fermân-ı âlîlerine imtisâlen sâhibe-i arzuhâl Gül Nasrâniye oğlu Abraham zimmî talebiyle savb-ı şer‘-i enverden irsâl olunan Mevlânâ Hıfzı el-Hâc Mehmed Efendi dâ‘îleri İstanbul’da Çoban Çavuş Câmi‘-i şerîfine varıp Müslimîn huzûrlarında ba‘de akdi’l-meclis mahalle-i mezbûre imâmı es-Seyyid Osman Efendi ve müezzini es-Seyyid Süleyman Halîfe ve ahâlî-i mahalleden sekiz nefer mazbûtü’l-esâmî kimesnelerden derûn-ı arzuhâlde mezkûrü’l-ism gāib ani’l-meclis Miskçi Şahin zimmînin keyfiyet-i ahvâlini tafahhus ve suâl olundukda mesfûr Şahin zimmî iki sene mukaddem mahallemiz sâkinlerinden olup ahâlî-i mahalleyi ta‘cîz ve rencîdeden hâlî olmamağla mahalle-i mezbûreden bâ-i‘lâm-ı şer‘î ihrâc olunmuş idi, el-hâletü hâzihi mesfûrdan bir vechile emniyetimiz olmamağla mesfûr Şahin’i mahallemizde süknâ murâd edip bizler dahi şer ü mekrinden emîn olmadığımız ecilden mezbûr mahallemizde sâkin olmayıp âhar mahalle gitmesini iltimâs eylediklerinden sonra merkūme Gül Nasrâniye ile oğlu mersûm Abraham zimmî kendi hallerinde ve ırzlarıyla mukayyed ve kendülerden her vechile râzılar olup hüsn-i hallerini alâ-tarîkı’ş-şehâde haber verdiklerini mevlânâ-yı mezbûr mahallinde ba‘de’t-tahrîr ümenâ-i şer‘ ile meclis-i şer‘a gelip alâ-vukū‘ihi inhâ ve takrîr eyledikleri huzûr-ı âlîlerine i‘lâm olundu. Fî 6 S sene 1153.