Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 474 Hüküm no: 597 Orijinal metin no: [73b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Efendi’nin duvarındaki tahta perde yıkıldığından Hüseyin’in evi görüldüğü için bu tahta perdenin yeniden yapılması Ma‘rûz Zikri âtî husûsu mahallinde keşf ve tahrîri için bi’l-iltimâs savb-ı şer‘-i enverden irsâl olunan keşif nâibi Mevlânâ Hıfzı el-Hâc Mehmed Efendi hâssa mimârlarından Şa‘bân Halîfe ile mahmiye-i İstanbul’da Kasab İvaz mahallesinde vâki‘ mahall-i nizâ‘ın üzerine varıp Müslimîn huzûrlarında akd-i meclis-i şer‘ ettikde kendiden asîl ve zevce-i menkûhası Havva nâm hatun tarafından vekîl-i sâbitü’l-vekâlesi Hüseyin meclis-i ma‘kūd-ı mezkûrda câr-ı mülâsıkı Mustafa Efendi mahzarında mezbûr Mustafa Efendi’nin menzilinin işbu duvarı üzerine olan kapaklama tahta perdesi bundan akdem münhedim olmağla mezbûr Mustafa Efendi’nin sofasından ve dehlizinden benim ve müvekkilem mezbûr ile ale’l-iştirâk mutasarrıf olduğumuz menzilimin makarr-ı nisvân olan mevâzi‘ine havâlesi ve zarâr-ı şer‘îsi olmağla duvar-ı mezkûr üzerine vaz‘-ı kadîmi üzere havâlesini def‘e mezbûr Mustafa Efendi’ye tenbîh olunmak bi’l-asâle ve bi’l-vekâle matlûbumdur deyü ba‘de’d-da‘vâ ve’n-nazar fi’l-hakīka mezbûr Mustafa Efendi’nin menzilinin sofasından ve dehlizinden müdde‘î-i mezbûrun menzilinin makarr-ı nisvân olan mevâzi‘ine havâlesi ve zarâr-ı şer‘îsi olduğu müte‘ayyen oldukdan sonra mârrü’z-zikr duvarı üzerinde kapaklama tahta perdesi olduğunu ikrâr ve i‘tirâf etmeğin alâ-mûcib-i i‘tirâfihî zikr olunan kendi duvarı üzerine vaz‘-ı kadîmi üzere kapaklama tahta perde havâle ile zarâr-ı şer‘îsin def‘e mezbûr Mustafa Efendi’ye mevlânâ-yı mezbûr mahallinde tenbîh eylediğini ümenâ-i şer‘le meclis-i şer‘a gelip alâ-vukū‘ihi inhâ eyledikleri huzûr-ı âlîlerine i‘lâm olundu. Fî 6 S sene 1153.