Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 476 Hüküm no: 600 Orijinal metin no: [73b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine’nin eşi Ali’den muhâlaa ile boşandığı ve mehrini talep edemeyeceği Ma‘rûz Zâtı ta‘rîf-i şer‘î ile mu‘arrefe olan Emine bt. İbrahim nâm hatun Mahkeme-i Bâb’da meclis-i şer‘de zevc-i sâbıkı Ali b. Mustafa mahzarında mezbûr Ali zevcim olup beynimizde hüsn-i mu‘âşeretimiz olmamağla zimmetinde mütekarrer ve ma‘kūdün-aleyh üç bin akçe mehr-i müeccelim ve nafaka-i iddet-i mu‘ayyene-i ma‘lûmem üzerlerine ve me’ûnet-i süknâm dahi kendi üzerime olmak üzere bin yüz elli iki senesi Cemâziyelâhiresinin on altıncı günü Ahî Çelebi Mahkemesi’nde hilâfeten müvellâ olan Nimetullah Efendi huzûrunda mezbûr Ali ile muhâla‘a-i sahîha-i şer‘iyye ile hul‘ olduğumda ol dahi ber-vech-i muharrer hul‘-i mezbûru ba‘de’l-kabûl hukūk-ı zevciyete müte‘allıka âmme-i da‘vâdan her birimiz âharı ibrâ ve ıskāt etmiş idik, lâkin ibrâ-i mezkûr kerh-i mu‘teber ile olmağla mehr-i müeccel-i mezkûr üç bin akçeyi mezbûr Ali’den taleb ederim deyü ba‘de’d-da‘vâ ve’l-inkâr müdde‘iye-i mezbûre Emine ber-vech-i muharrer müdde‘âsını beyâna kādire olmayıp tahlîfe dahi tâlibe olmamağla mezbûre Emine Hatun bilâ-beyyine bî-vech mu‘ârazadan men‘ olunduğu huzûr-ı âlîlerine i‘lâm olundu. Fî 7 S sene 1153.