Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 482 Hüküm no: 613 Orijinal metin no: [74b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Efendi’nin Cizyedar İbrahim Ağa’dan aldığı cizye evrakı hesabından sonra zimmetinde olan borcu ile alakalı davaya sulh bedeli karşılığı son verildiği Bâ-mühr-i efendi, sulh Ma‘rûz Sâhibe-i arzuhâl Fâtıma’nın zevci Mustafa Efendi meclis-i şer‘de derûn-ı arzuhâlde mezkûrü’l-ism es-Seyyid İbrahim Ağa muvâcehesinde bundan akdem mezbûr es-Seyyid İbrahim Ağa mahrûse-i Edirne cizyedârı iken mahrûse-i mezbûre havâlîsinde uhdesinde olan Yanbolu ve Üsküdar cizyeleri evrâkından a‘lâ ve evsat ve ednâ i‘tibâriyle dört bin dört yüz cizye evrâkını bana def‘ ve teslîm ben dahi ba‘de’t-tevzî‘ ağa-i mûmâ-ileyh ile hesâb gördüğümüzde teslîmâtımdan mâ‘adâ zimmetimde bâkī kalan bin guruş deynim mukābelesinde ben ve hâzıra bi’l-meclis zevcem mezbûre Fâtıma mâlımızdan ber-mûceb-i defter-i müfredât eşyâ-i ma‘lûmemizi irhân ve teslîm mezbûr es-Seyyid İbrahim Ağa dahi irtihân ve tesellüm ve kabûl eylediğinden sonra deyn-i mezbûrun yüz yirmi buçuk guruşunu edâ edip zimmetimde ancak sekiz yüz yetmiş dokuz buçuk guruş deynim bâkī kalmış iken mezbûr es-Seyyid İbrahim Ağa rihân-ı mezbûreden işbu defter mantûkunca bin yüz on guruş kıymetli eşyâ-i ma‘lûmemizi iznimiz yoğ iken fuzûlî âhara bey‘ ile istihlâk etmekle rihân-ı müstehleke kıymetinden sekiz yüz yetmiş dokuz buçuk guruş deyn-i mezkûrdan ol mikdârına takas olundukdan sonra bâkī kalan iki yüz yetmiş buçuk guruşu bi-tarîkı’z-zamân mezbûr es-Seyyid İbrahim Ağa’dan taleb ederiz deyü eyledikleri da‘vâlarında mezbûr Mustafa Efendi ve zevcesi merkūme Fâtıma yüz guruş bedel-i makbûza mezbûr es-Seyyid İbrahim Ağa ile ber-nehc-i şer‘î sulh olup gerek müdde‘iyân-ı mezbûrân ve gerek mezbûre Fâtıma’nın vâlidesi hâzıra bi’l-meclis Hadîce nâm hatun târîh-i i‘lâma gelince âmme-i da‘vâdan merkūm es-Seyyid İbrahim Ağa’nın zimmetini ibrâ ve ıskāt eylediklerinde ol dahi kezâlik âmme-i da‘vâdan mezbûrûnun zimmetlerini ibrâ-i âm ile ibrâ ve ıskāt edip kat‘-ı nizâ‘ eyledikleri ba‘de’t-tescîl huzûr-ı âlîlerine i‘lâm olundu. Fî 8 S sene 1153.