Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 484 Hüküm no: 619 Orijinal metin no: [74b-8] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed’in Kıztaşı Hamamı yakınındaki eski dükkânda hoşafçılık yapmasına izin verildiği Ma‘rûz İstanbul’da Dülgerzâde mahallesi imâmı el-Hâc Mahmud Efendi b. İsmail ve ahâlîsinden İbrahim Ağa b. Ahmed ve Mehmed Efendi b. Şahabeddin ve Ali Efendi b. Abdullah ve Kayyım Musa b. Mehmed ve es-Seyyid Mehmed Çelebi b. Ahmed ve Ali b. Mehmed ve Ahmed b. Abdullah ve Selim Beşe b. el-Hâc Ebû Zeyd ve es-Seyyid Hüseyin Çelebi b. es-Seyyid Ahmed nâm kimesneler meclis-i şer‘de hoşâbcılar kethüdâsı es-Seyyid Mustafa Çelebi b. es-Seyyid Ahmed ve ihtiyâr hoşâbcı ustalarından müseccelü’l-esâmî on nefer kimesneler muvâcehelerinde zikr olunan Dülgerzâde mahallesine karîb Kıztaşı Hamâmı kurbünde kadîmden hoşâbcı dükkânı olup lâkin mürûr-ı ezmine ile dükkân-ı mezkûr harâb ve civârında hoşâbcı dükkânı dahi olmayıp bi’l-iktizâ bir hoşâbcı dükkânına ahâlî-i mahallenin ihtiyâcı olduğundan mâ‘adâ işbu sâhib-i arzuhâl Mehmed kadîmden Büyük Karaman’da hoşâbcı olup ve hoşâbcı ustalarının ihtiyârlarından olmağla müstakīm ve ehl-i ırz ve cümlemizin emîni olmağın mezbûr Mehmed’in harâb olan hoşâbcı dükkânında kemâ-fi’l-evvel hoşâbcılık işlemesi murâdımızdır dediklerinde kethüdâ-yı mezbûr es-Seyyid Mustafa Çelebi ve sâir ihtiyâr hoşâbcı ustaları dahi mezbûr Mehmed kadîmden hoşâbcı ustalarından olduğuna binâen dükkân-ı mezkûrda hoşâbcılık işlemesine râzı ve bu vechile tevâfuk eyledikleri bi’l-iltimâs huzûr-ı âlîlerine i‘lâm olundu. Fî 13 S sene 1153.