Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 505 Hüküm no: 663 Orijinal metin no: [77b-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan’ın gemisinde altı ay çalışan gemicilerin ücret nedeniyle açtıkları davada haksız oldukları Bâ-mühr-i efendi Ma‘rûz Mellâh tâifesinden Yani v. Bandazi ve Kostandi v. Yanaki ve Kostantin v. Panayot ve Yorgi v. Yani ve Yani v. Engiri ve Yorgi v. Kosasto ve Fero v. Kiryazi ve Apostol v. Angeli ve Esteryo v. Mihal ve Nikola v. Yorgi ve Panayot v. İstemad ve Dimitri v. Yorgi ve Panayot v. Todoş ve Yamandi v. Yorgi nâm zimmîler meclis-i şer‘de el-Hâc Hasan muvâcehesinde bundan akdem mezbûr el-Hâc Hasan’ın sefînesinde müddet ta‘yîn olunmadın emriyle altı ay gemicilik etmiş idik, hâlâ müddet-i mezkûrede ücretimiz olmak üzere her birimize yirmi dokuzar guruş teslîm eyledi, lâkin meblağ-ı mezbûrdan ecr-i mislimiz ziyâdedir deyü da‘vâ eylediklerinde husûs-ı mezbûra vukūf-ı tâmmı olan cerîdede mazbûtü’l-esâmî bî-garaz Müslimîn müdde‘ûn-ı mezbûrûnun müddet-i mezkûrede ecr-i misilleri yirmi dörder guruş olup me’hûzları olan meblağ-ı mezbûr yirmi dokuz guruş ecr-i misillerinden ziyâdedir deyü bi’l-muvâcehe alâ-tarîkı’ş-şehâde ihbâr eylediklerinde mûcebince müdde‘ûn-ı mezbûrûn bî-vech mu‘ârazadan men‘ olundukları huzûr-ı âlîlerine i‘lâm olundu. Fî 24 S sene 1153.