Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 346 Hüküm no: 505 Orijinal metin no: [75b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali b. Abdurrahman’ın Receb bölükbaşının oğlu Mehmed’e olan borcunu ödemesi Bundan akdem vefât eden Receb bölükbaşının sulbî oğlu Mehmed nâm sagīrin tesviye-i umûruna kıbel-i şer‘den mansûb vasîsi olan Nasuh Halîfe b. Mustafa mahfil-i kazâda Galata’da Arab Câmi‘i Mahallesi’nde sâkin Ali b. Abdurrahman nâm kimesne mahzarında bi’l-vesâye üzerine da‘vâ edip sagīr-i mezbûrun mâl-ı mevrûsundan mez[bûr] Ali zimmetinde karz-ı şer‘îden dört yüz altmış kıt‘a riyâlî guruş hakkı vardır, suâl olunup meblağ-ı mezbûr vesâyetimiz hasebiyle bana alıverilmek matlûbumdur dedikde gıbbe’s-suâl mezbûr Ali cevâbında fi’l-vâki‘ sagīr-i mezbûrun mâl-ı mevrûsundan meblağ-ı mezbûr dört yüz altmış riyâlî guruşu el-ân zimmetimde lâzımü’l-edâ ve vâcibü’l-kazâ deynimdir deyü bi’t-tav‘ ikrâr u i‘tirâf etmeğin mûcebince meblağ-ı mezbûru vasiyy-i merkūma edâ ve teslîm etmek üzere merkūm Ali iltizâm olunup mâ-vaka‘a gıbbe’t-taleb ketb olundu. Fi’l-hâdî ve’l-ışrîn min-Zilka‘deti’ş-şerîfe li-sene erba‘a ve sittin ve elf. Şuhûdü’l-hâl: Pîrî Beşe b. Hüseyin, İbrahim Çelebi b. Davud, Mehmed Kapıcı b. Hüseyin, Kemhacı Mehmed b. Abdullah ve gayruhum.