Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 345 Hüküm no: 504 Orijinal metin no: [75a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rahime Hatun’un sattığı evin parasını kendisine ulaştırmak üzere kocasını vekil tayini Mahmiye-i İstanbul’da Peykhâne Mahallesi’nde sâkin Siyavuş Bey b. Abdullah mahfil-i kazâda kasaba-i Kasımpaşa’da Büyük Piyale Paşa Mahallesi’nde sâkine olan Rahime bt. Abdulkādir Efendi nâm hatunun zevci işbu bâ‘isü’l-kitâb Hatır Bey b. Budak mahzarında üzerine da‘vâ edip mezbûr Hatır Bey’in zevcesi merkūme Rahime Hatun zikrolunan Piyale Paşa Mahallesi’nde vâki‘ yine Piyale Paşa Vakfı’ndan icâre-i mu‘accele ve müeccele ile mutasarrıfe olduğu hudûdu beynimizde ilm-i şer‘î ile ma‘lûm olan menzilinin hakk-ı tasarrufunu vakf-ı mezbûr mütevellîsi ma‘rifetiyle bin altmış bir senesinde yirmi beş bin akçe bedel mukābelesinde bana ferağ ve tefvîz edip ben dahi tefevvüz ve kabûl eylediğimden sonra bedeli olan meblağ-ı mezbûr yirmi beş bin akçeyi mezbûr Hatır Bey zevcem mezbûre Rahime Hatun kabzına beni vekîl eyledi deyü bi’t-tamam ahz u kabz eylemiş idi, varıp meblağ-ı mezbûru îsâl etmekle mezbûre Rahime benden taleb eder ben dahi mezbûr Hatır Bey’den taleb ederim, suâl olunsun dedikde gıbbe’s-suâl mezbûr Hatır Bey cevâbında zevcem mezbûre Rahime Hatun meblağ-ı mezbûr yirmi beş bin akçeyi merkūm Siyavuş Bey’den ahz u kabza tarafından beni vekîl eylemiş idi, ben dahi vekâletim hasebiyle kabz eyledim deyicek gıbbe’l-inkâr mezbûr Hatır Bey’den vekâletini mübeyyin beyyine taleb olundukda udûl-i Müslimînden eş-Şeyh Ali Efendi b. Mehmed ve Mehmed Çelebi b. Ali li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka mezbûre Rahime târîh-i mezbûrda mezkûr Siyavuş Bey’e tefvîz eylediği menzil-i mezbûrun bedeli olan meblağ-ı mezbûr yirmi beş bin akçeyi ahz u kabza zevci mezbûr Hatır Bey’i bizim huzûrumuzda tarafından vekîl eyledi, biz bu husûsa şâhidleriz şehâdet dahi ederiz deyü herbiri edâ-yı şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebince mezbûr Siyavuş Bey merkūm Hatır Bey’e ta‘arruzdan men‘ olunup mâ-hüve’l-vâki‘ gıbbe’t-taleb ketb olundu. Fi’l-yevmi aşer min-Zilka‘deti’ş-şerîfe li-sene erba‘a ve sittin ve elf. Şuhûdü’l-hâl: es-Seyyid Abdulkādir Efendi, İbrahim Çelebi b. Davud, Pîrî Beşe b. Hüseyin, Mehmed Kamçı muhzır, Halil Beşe çukadâr, Rıdvan b. Abdullah ve gayruhum.