Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 510 Hüküm no: 673 Orijinal metin no: [78b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Helvacı olmayanların çarşı ve sokaklarda revani satmamaları Bâ-mühr-i efendi Ma‘rûz Mahmiye-i İstanbul’da helvacı hırfetinin bâ-berât-ı âlîşân kethüdâları el-Hâc Mehmed ve hırfet-i mezkûreden Mustafa b. Mehmed ve Mehmed b. Mustafa ve Mehmed b. Ömer ve sâir cerîdede mastûrü’l-esâmî kimesneler meclis-i şer‘de el-Hâc Hüseyin b. Hasan ve el-Hâc Mehmed b. Ramazan ve es-Seyyid el-Hâc Süleyman b. el-Hâc Ahmed ve el-Hâc Abdülkerim b. el-Hâc Ömer ve sâirleri muvâcehelerinde müddet-i medîdeden berü işbu yedimizde olan evâmir-i aliyye ve hücec ve i‘lâmlar mantûkunca helva ve haleviyyâtın envâ‘ ve ecnâsını hırfetimiz erbâbı dükkânlarda bey‘ edip mahallât ve esvâkda bey‘ etmemek üzere beynimizde nizâm verilip her birimiz âsûde hâl üzere iken hâlâ helvacılık san‘atında bir vechile alâka ve medhali olmayan mezbûrûn ve sâirleri revânî tabh ve hilâf-ı emr-i âlî mahallât ve esvâkda bey‘ edip kadîmî nizâmımızın ihtilâline ve ibâdullahın ızrârına bâdî ve bâ‘is olurlar deyü teşekkî ve mazmûnları takrîr-i meşrûhlarına mutâbık evâmir-i şerîfe ve hücec ve i‘lâmlar ibrâz ve muvâcehelerinde feth ü kırâet ve ilzâm ve iskāt olunmağla fîmâ-ba‘d hilâf-ı emr-i âlî hareketden men‘ ü def‘ olunduklarını nâtık fermân-ı âlî iltimâs eyledikleri huzûr-ı âlîlerine i‘lâm olundu. Fî 23 S sene 1153.