Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 515 Hüküm no: 685 Orijinal metin no: [79b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kayıkcı, kürekçi ve mavnacıların Tersane-i âmireye teslim edilecek paranın toplanmasında nizama uygun hareket edecekleri konusunda anlaştıkları Ma‘rûz Kayıkcıyân esnafından ashâb-ı arzuhâl başkethüdâsı Mehmed Beşe ve Eyüb İskelesi kethüdâsı es-Seyyid Süleyman ile gāibûn ani’l-meclis ve Defterdâr İskelesi kethüdâsı Hüseyin ve Fener İskelesi kethüdâsı Mustafa ve Balat iskelesi kethüdâsı es-Seyyid Mehmed ve Cibali İskelesi kethüdâsı Halil ve Unkapanı İskelesi kethüdâsı es-Seyyid Mehmed ve Kumkapı İskelesi kethüdâsı Halil ve Samatya İskelesi kethüdâsı es-Seyyid Halil ve Langa Yenikapı İskelesi kethüdâsı el-Hâc Mustafa ve Beşiktaş İskelesi kethüdâsı Mustafa ve Azabkapı İskelesi kethüdâsı Soğancı Hasan ve Hasköy İskelesi kethüdâsı İsmail ve Bahçekapı İskelesi kethüdâsı Ahmed ve Ahırkapı İskelesi kethüdâsı diğer Ahmed ve Çatladıkapı İskelesi kethüdâsı Mahmud ve Karaköy İskelesi kethüdâsı es-Seyyid Abdulkadir ve mavnacı kethüdâsı Veli yedlerinde olan mühürlü ve nişânlı sûret-i defter-i mevkūfât ve emr-i âlîşânda ta‘yîn ve tasrîh olunduğu üzere İstanbul etrâfında vâki‘ iskelelerin kayıkcıyân ve peremeciyân ve mavnacıyân esnafının cem‘an seksen yedi buçuk ve bir rub‘ kürekciyân neferlerinin her bir neferinden otuz guruş kürekciyân yedlerinden iki bin altı yüz otuz iki buçuk guruş cem‘ ve tahsîl ve teslîm-i Tersâne-i âmire olunagelmiş iken bin yüz kırk yedi senesinde yirmi beş guruş dahi zam olunmağla cem‘an iki bin altı yüz elli yedi buçuk guruş bedel-i kürekciyân mâlları Tersâne-i âmire ocaklığı olduğuna binâen meblağ-ı merkūm cem‘ ü tahsîl ve teslîm-i Tersâne-i âmire olmak üzere bin yüz elli senesi Zilhicceti’ş-şerîfesinde dahi beynimizde nizâm verilmekle fîmâ-ba‘d nizâm-ı mezkûrdan noksân ve ziyâde mutâlebesiyle birbirlerini ta‘cîz ve rencîde etmemek üzere kavl ü ittifâk ettiklerini mezbûrân Mehmed Beşe ve es-Seyyid Süleyman meclis-i şer‘de inhâ ve takrîr etmeleriyle nizâm-ı mezkûr düstûrü’l-amel olmak üzere yedlerine tuğrâlı emr-i âlîşân sadaka ve ihsân buyrulmak ricâsında oldukları Mahkeme-i Bâb’da tescîl ve huzûr-ı âlîlerine i‘lâm olundu. Fî 25 S sene 1153.