Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 517 Hüküm no: 689 Orijinal metin no: [79b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden hanımı Havva’dan haksız yere para alındığı iddiasının geçersiz olduğu Bâ-mühr-i efendi Ma‘rûz Mahmiye-i İstanbul’da Voynuk Şücâ‘ mahallesinde sâkine iken bundan akdem vefât eden Havva bt. Ali nâm hatunun zevci sâhib-i arzuhâl Salih nâm kimesne meclis-i şer‘de mahalle-i mezbûrede ashâb-ı hayrâtdan tüccâr Sinan binâ eylediği mescid-i şerîfin sâbıkā imâmı Şeyh Mustafa Efendi mahzarında mezbûr Mustafa Efendi zevcem mevrûsem müteveffât-ı mezbûrenin hayâtında yüz seksen guruşunu bi-gayr-ı hakkın ahz u kabz eyledikden sonra zevcem mezbûre Havva bi-emrillâhi te‘âlâ vefât edip meblağ-ı mezbûrun nısfı bi’l-ırsi’ş-şer‘î bana isâbet ve intikāl etmekle hâlâ taleb ederim deyü da‘vâ ve mezbûr Şeyh Mustafa Efendi cevâbında mescid-i mezbûr evkāfından olup mahalle-i mezbûrede vâki‘ ma‘lûmü’l-hudûd ve’l-müştemilât bir bâb menzil icâre-i mu‘accele ve müeccele mezbûre Havva ile sadrî oğlu Abdurrahman’ın ale’l-iştirâki’s-seviyy tasarruflarında iken mezbûr Abdurrahman bi-emrillâhi te‘âlâ bilâ-veled fevt olup nısf hissesi taraf-ı vakfa âid ve râci‘ olmağla hisse-i mezbûre yed-i münâdî ile mecma‘-ı nâs olan mahallerde nidâ ve müzâyede ve rağabât-ı nâs bi’l-külliye munkatı‘a ve yüz seksen guruş mu‘accele ve ayda yedi buçuk akçe müeccele ile nısf-ı âharına mutasarrıfa olan mezbûre Havva üzerine karâr ben dahi ber-vech-i meşrûta tevliyetim hasebiyle mezbûre Havva’ya îcâr ve mu‘accele-i mezkûreyi yedinden tamâmen ahz u kabz ve istîfâya müte‘allıka da‘vâdan mezbûre Havva zimmetimi ibrâ ve ıskāt eyledi deyü takrîr-i meşrûhuna mutâbık bir kıt‘a i‘lâm ve temessük ibrâz ve mezbûr Salih mazmûnlarını tav‘an ikrâr ve i‘tirâf etmekle bî-vech mu‘ârazadan men‘ olunduğu huzûr-ı âlîlerine i‘lâm olundu. Fî 25 min-Safer sene 1153.