Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 348 Hüküm no: 508 Orijinal metin no: [76a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yani v. İstati’nin borcuna karşılık evini rehin olarak verdiği Vilâyet-i Rumeli’nde Kerpiniş kazâsında sâkin Yani v. İstati nâm zimmî meclis-i şer‘de işbu bâ‘isü’r-rakīm Danyel v. Konye nâm zimmî muvâcehesinde ikrâr-ı tâm ve takrîr-i kelâm edip bundan akdem mezbûr Danyel bana bin fıddî râyic fi’l-vakt akçe ikrâz ve teslîm ben dahi yedinden meblağ-ı mezbûr bin akçeyi iktirâz ve tesellüm eyleyip mukābelesinde nefs-i Kerpiniş’de vâki‘ bir tarafdan Yovan nâm zimmî bağçesi ve bir tarafdan Papa Dimitri mülkü ve iki tarafdan tarîk-i âm ile mahdûd ve mümtâz fevkānî ve tahtânî iki beyti ve muhavvata-yı kebîreyi müştemil mülk-i mevrûsum olup zimmî-i merkūm Danyel’e ol târîhde rehin vaz‘ eyleyip ol dahi irtihân ve kabûl ve kabz ve tesellüm eylemiş idi dedikde mukırr-ı mezbûr ikrâr-ı meşrûhunda el-mukarru lehü’l-merkūm Danyel vicâhen tasdîk ve şifâhen tahkīk etmeğin mâ-hüve’l-vâki‘ bi’t-taleb ketb olundu. Fi’l-yevmi’l-hâdî aşer min-Zilhicceti’ş-şerîfe li-sene erba‘a ve sittin ve elf. Şuhûdü’l-hâl: Mehmed Çelebi b. Ahmed, Derviş b. Ali, <> el-Hâc Şa‘ban b. Ahmed, Pîrî b. Hüseyin, Rıdvan [b.] Abdullah, Muharrem b. Abdullah ve gayruhum.