Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 348 Hüküm no: 509 Orijinal metin no: [76a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Receb Beşe ile Abdullah Beşe’nin Kasap Yorgi’den alacakları olduğu Bostancı tâifesinden işbu râfi‘ayü’l-kitâb Receb Beşe b. Mustafa [ve] Abdullah Beşe b. el-Hâc Halil nâm kimesne meclis-i şer‘de kasab tâifesinden Yorgi v. Dimitri muvâcehesinde üzerine herbiri da‘vâ ve takrîr-i kelâm edip mezbûr Yorgi zimmetinde herbiri yüz kırkar akçeye olmak üzere yedimizden müşterâ ve makbûz olan yüz beş aded koyun bahâsından on dört bin yedi yüz akçe hakkımız olup meblağ-ı mezbûrdan on bir bin altı yüz akçesini mukaddemâ mezbûr Yorgi yedinden bi’d-defa‘ât ahz u kabz edip ve altı yüz akçesinden dahi mezbûr Yorgi’nin zimmetini ibrâ edip bâkī kalan iki bin dört yüz akçe hakkımızı taleb ederiz dediklerinde gıbbe’s-suâl mezbûr Yorgi cevâbında fi’l-hakīka müdde‘iyân-ı mezbûrâna iki bin dört yüz akçe minvâl-i muharrer üzere zimmetimde el-ân lâzımü’l-edâ ve vâcibü’l-kazâ deynimdir deyü bi-tav‘ihi ikrâr u i‘tirâf etmeğin ikrârı mûcebince meblağ-ı mezbûrun edâsına mezbûr Yorgi’ye tenbîh olunup mâ-vaka‘a bi’t-taleb ketb olundu. Hurrire fi’t-tâsi‘ min-Zilhicceti’ş-şerîfe li-sene erba‘a ve sittin ve elf. Şuhûdü’l-hâl: Rıdvan Beşe b. Abdullah, Pîrî Beşe b. Hüseyin, Halil Beşe b. Lütfullah, Muharrem b. Abdullah ve gayruhum.