Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 531 Hüküm no: 716 Orijinal metin no: [82a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Usturacılar kethüdalığına Mehmed Emin Çelebi’nin tayin edildiği Bâ-mühr-i efendi Ma‘rûz Mahmiye-i İstanbul’da Sultan Bayezid-i Veli Câmi‘-i şerîfi havlusunda vâki‘ usturacı tâifesinin ihtiyârlarından ashâb-ı arzuhâl Mustafa Çelebi b. Ahmed ve Hüseyin b. Ali ve Molla Mehmed b. Süleyman ve sâir cerîdede isimleri mastûr yirmi altı nefer kimesneler meclis-i şer‘de derûn-ı arzuhâlde mastûrü’l-ism Hasan Odabaşı b. İbrahim nâm kimesne mahzarında bundan akdem beynimizde vâki‘ umûrumuzu rü’yet ve nizâm-ı ahvâlimize temşiyet vermek için cümle ma‘rifetiyle mezbûr Hasan Odabaşı kethüdâ nâsb u ta‘yîn olunmuş idi mezbûrun tama‘-ı hâmmı olmağla celb-i mâl sevdâsıyla hırfet-i mezkûr erbâbını bi-gayr-ı hakkın rencîde vü remîde ve tazyîk ve tekdîr ve umûrumuzu muhtel ve müşevveş etmekle evzâ‘ ve harekâtından cümlemiz hoşnûd ve râzı değilleriz deyü teşekkî ve sâbıkā kethüdâmız olan hâzır bi’l-meclis el-Hâc Mehmed Emin Çelebi cümlemizin muhtâr ve mu‘temedi olmağla üzerimize kethüdâ nasb u ta‘yîn olunmak matlûbumuzdur dediklerinde mezbûr el-Hâc Mehmed tâife-i mezbûre üzerlerine kemâ-fi’l-evvel kethüdâ nasb u ta‘yîn olunup ol dahi kabûl ve umûrlarını rü’yet ve nizâm-ı ahvâllerine temşiyet vermeğe müte‘ahhid olup yedine berât-ı âlîşân inâyet ve ihsân buyrulmak iltimâs eyledikleri huzûr-ı âlîlerine i‘lâm olundu. Fî 7 Ra sene 1153.