Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 532 Hüküm no: 718 Orijinal metin no: [82b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Kethüda Evkafı’na ait harab ekmekçi fırınının Abdullah’a kiralanarak tamirinin yapılıp çalıştırılması Bâ-mühr-i efendi Ma‘rûz Mahmiye-i İstanbul’da Cezerî Kasım Paşa mahallesinde vâki‘ müteveffâ merhûm Ahmed Kethüdâ Evkāfı’nın evlâdiyet ve meşrûtiyet üzere mütevellîyesi olan sâhibe-i arzuhâl İsmihan Hanım’ın vekîl-i müsecceli el-Hâc Abdullah nâm kimesne meclis-i şer‘de vakf-ı mezbûr müstagallâtından olup mahalle-i mezbûrede vâki‘ Pîrî Kethüdâ fırını demekle ma‘rûf bir bâb kadîmî ekmekci fırını mürûr-ı eyyâm ve kürûr-ı şühûr ve a‘vâm ile harâb ve mâil-i türâb olduğundan mu‘attal kalmağla hâlâ ta‘mîr ü termîm ve cümle ma‘rifetiyle çörekci tâifesinden bir mu‘temed kimesneye îcâr olunmak ibâdullaha ve vakf-ı mezbûra vücûhla evlâ ve enfa‘ olmağla husûs-ı mezbûra vukūf-ı tâmmı olan mevsûk kimesnelerden istihbâr ve haberleri tahrîr ve vech-i meşrûh üzere binâya bana izin verilmek matlûbumdur dedikde hakīkat-i hâl çörekciler kethüdâsı el-Hâc Mustafa ve yiğitbaşı el-Hâc Mehmed ve ekmekciler kethüdâsı el-Hâc Mehmed ve yiğitbaşı Ömer ve hırfet-i mezkûreden ve ahâlî-i mezbûreden cerîdede isimleri mastûr kimesnelerden istihbâr olundukda fırın-ı mezkûr hakkında vekîl-i mezbûr el-Hâc Abdullah’ın takrîr-i meşrûhu vâkı‘a mutâbık ve nefsü’l-emre muvâfıkdır deyü her biri ihbâr ve vech-i meşrûh üzere binâya izin verilmek üzere fermân-ı âlî iltimâs eyledikleri huzûr-ı âlîlerine i‘lâm olundu. Fî 10 Ra sene 1153.