Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 533 Hüküm no: 719 Orijinal metin no: [82b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kastamonu’daki Hoca Hayreddin ve Sitti Hatun vakıf mütevellilerinin, anlaşmazlığın halli için mahkemede bulunması Ma‘rûz Sâhib-i arzuhâl Hasan’ın babası müteveffâ el-Hâc Mustafa b. Şa‘bân derûn-ı arzuhâlde mezkûr olup Âsitâne-i sa‘âdetde mesned-nişîn-i şerî‘at-i garrâ olan efendiler dâ‘îleri nezâretlerinde medîne-i Kastamonu’da vâki‘ merhûm Hoca Hayreddin Efendi ve merhûme Sitti Hatun vakıfları olan Çifte Hamam demekle ma‘rûf hamam ve kapan-ı dakīkı beher sene on iki bin akçeye mütevellîlerden istîcâr edegelip mezbûr el-Hâc Mustafa vefât ettikde mezbûrun ekber ve aslah evlâdı olan mezbûr Hasan vech-i muharrer üzere beher sene on iki bin akçeye istîcâr edegelmekle müteveffâ-yı mezbûrun kızları Fâtıma ve Saliha’nın vasîleri Ahmed nâm kimesne arzuhâlde derkenâr olunduğu üzere hamam ve kapan-ı mezkûr müteveffâ-yı mezbûr el-Hâc Mustafa’nın icâreteyn ile tasarrufunda iken fevt olup zikr olunan hamam ve kapan-ı dakīk kızları mezbûreler ile medîne-i mezbûrede karındaşı mezbûr Hasan’a intikāl edip lâkin mezbûr Hasan kendi hissesine kanâ‘at etmeyip mezbûreler hisselerini bi-gayr-ı hakkın zabt ve tasarruf etmişdir deyü mezbûr Hasan ile mahallinde şer‘le görülmek için bin yüz elli bir senesi Zilhiccesi evâhiri târîhiyle taraf-ı aliyye-i cihân-dârîden fermân-ı âlî ısdâr edip lâkin husûs-ı mezkûrun istimâ‘ında mütevellîlerin şer‘an huzûrları lâzım olup merhûm Sitti Hatun Vakfı’nın ber-vech-i meşrûta mütevellîsi mevâlî-i izâmdan İsazâde Abdurrahman Efendi dâ‘îleri hâlâ mahrûse-i Edirne kādısı ve Hoca Hayreddin Efendi Vakfı’nın ber-vech-i meşrûta mütevellîsi müderrisîn-i kirâmdan La‘lîzâde es-Seyyid Mehmed Ma‘sum Efendi olup medîne-i mezbûreye gitmelerinde su‘ûbet olmağın vasiyy-i mezbûr Ahmed kendi ve yâhûd Âsitâne-i sa‘âdetde medîne-i mezbûre tüccârından birini tarafından vekîl edip Âsitâne-i sa‘âdet-âşiyânede mütevellîyân-ı mûmâ-ileyhimâ ile Dîvân-ı âlîlerinde mürâfa‘a-i şer‘ ve ihkāk-ı hak olunmak üzere mezbûr Hasan yedine müekked emr-i âlî ihsân ve sadaka buyrulmak ricâsına istirhâm ettiği Bâb Mahkemesi’nde tescîl ve huzûr-ı âlîlerine i‘lâm olundu. Fî 10 Ra sene 1153.