Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 536 Hüküm no: 726 Orijinal metin no: [83a-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Agya v. Bedros’un Ömer Efendi’ye olan borcunu kefilinin ödemesi Ma‘rûz Muhzır Mustafa mübâşeretiyle Bâb Mahkemesi’nde meclis-i şer‘a ihzâr olunan Agya zimmîden hasmı es-Seyyid Ömer Efendi gāib ani’l-meclis diğer Agya v. Bedros nâm zimmî zimmetinde işbu bin yüz elli senesi mâh-ı Rebî‘ülâhiri gurresi târîhiyle müverrah temessük mantûkunca cihet-i karzdan hakkım olan altmış guruşa mezbûr Agya bi’l-emr ve’l-kabûl kefîl olmağla mukaddemâ meblağ-ı mezbûrdan yirmi beş guruşu mezbûr Agya bana def‘ ü teslîm edip bâkī otuz beş guruşumu dahi kefâletine binâen mezbûr Agya’dan taleb ederim deyü da‘vâ eyledikde ol dahi ber-vech-i muharrer kefîl olduğunu ikrâr lâkin meblağ-ı mezbûrdan on bir guruş dahi teslîm eyledim deyü ba‘de’d-def‘ ve’l-inkâr mezbûr Agya def‘-i mezkûrunu beyâna kādir olmamağla bi’t-taleb mezbûr es-Seyyid Ömer Efendi’ye yemîn verildikden sonra meblağ-ı mezbûr otuz beş guruşu müdde‘î-i mezbûra edâ ve teslîmi lâzım gelmeğin mezbûr Agya zimmîye ber-vech-i muharrer tenbîh olunduğu huzûr-ı âlîlerine i‘lâm olundu. Fî 15 R sene 1153.