Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 542 Hüküm no: 740 Orijinal metin no: [84b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haçador ve Saltana’ya babalarından kalan vakıf dükkânların kendilerine verildiği Ma‘rûz Arzuhâl eden Haçador zimmî asâleten ve kız karındaşı Saltana Nasrâniyenin zevci ve tarafından vekîl-i sâbitü’l-vekâlesi Mıgırdıç zimmî vekâleten Bâb Mahkemesi’nde meclis-i şer‘de derûn-ı arzuhâlde mastûrü’l-ism Hüdaverdi zimmî muvâcehesinde zikri âtî vakıfların mütevellîsi Ahmed Efendi hâzır olduğu halde bundan akdem hâlik olan babamız Serkiz v. Avanes zimmînin mahmiye-i İstanbul’da Aksaray kurbünde Çakır Ağa mahallesinde Dörtyolağzı sûkunda vâki‘ arakiyeci Üveys nâm kimesne ve Zeyneb nâm hatun vakıflarından olup bi’l-icâreteyn taht-ı tasarrufunda olup ba‘de’l-helâk intikāl-i âdî ile bizlere intikāl eden bir bâb mahzenli terzi ve sarrâf ve manav dükkânlarında olan dokuz sehm hissemizi hâl-i sıgārımızda anamız gāibetü ani’l-meclis Berabyon bt. Abraham nâm Nasrâniye bizler kebîr olmak üzere bilâ-mesâğ-ı şer‘î mârrü’z-zikr dekâkîn-i mezkûrûnda olan dokuz sehm hisselerimizi bâ-ma‘rifet-i mütevellî kendi üzerine ettirip ba‘dehû kezâlik bâ-ma‘rifet-i mütevellî Rukiye nâm hatun üzerine edip ol dahi bâ-ma‘rifet-i mütevellî mesfûr Hüdaverdi üzerine etmekle sâlifü’z-zikr dokuz sehm hisseleri bi’l-asâle ve bi’l-vekâle taleb ve da‘vâ eylediklerinde mesfûr Hüdaverdi dahi hâl minvâl-i muharrer üzere olduğunu ikrâr ve i‘tirâf eylediğinden sonra beynlerine muslihûn tavassut edip dekâkîn-i mezkûrûnda olan dokuz sehm hisselerini mezbûr Haçador ile müvekkile-i mezbûre Saltana Nasrâniyeye bâ-ma‘rifet-i mütevellî ferâğ ve tefvîz onlar dahi ber-vech-i muharrer tefevvüz ve kabûl eylediklerinden sonra mezbûrân dahi zikr olunan dokuz sehmden üç sehmini yüz guruş icâre-i mu‘accele ile yine mesfûr Hüdaverdi zimmîye bâ-ma‘rifet-i mütevellî ferâğ ve tefvîz etmek üzere ta‘ahhüd edip bu vechile kat‘-ı nizâ‘ eyledikleri tescîl ve huzûr-ı âlîlerine i‘lâm olundu. Fî 19 Ra sene 1153.