Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 543 Hüküm no: 741 Orijinal metin no: [84b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dört sene önce kaybolan beygirin Mustafa’da bulunduğu Ma‘rûz Muhzır Ali mübâşeretiyle Bâb Mahkemesi’ne ihzâr olunan Nalband Mustafa’nın hasmı Arabacı Ömer meclis-i şer‘de mezbûr Mustafa mahzarında işbu mu‘âyene ve müşâhede olunan bir re’s doru bargiri târîh-i i‘lâmdan dört buçuk sene mukaddem Rumeli’de Hacıoğlu Pazarı kazâsına tâbi‘ Karaağaç nâm karyede gece ile mülkümden zâyi‘ etmiş idim hâlâ mezbûr Mustafa yedinde buldum bi’l-istihkāk taleb ederim deyü da‘vâ ettikde ol dahi cevâbında mezkûr bargiri dört sene mukaddem canbaz tâifesinden Süleyman Beşe yedinden otuz guruş semen-i medfû‘ ve makbûza iştirâ edip mülk-i müşterâm olmak üzere vaz‘-ı yed ederim deyü ikrâr mâ‘adâyı inkâr edicek müdde‘î-i mezbûr müdde‘âsını lede’t-tezkiye adâletleri zâhir olan arabacı tâifesinden Ali b. Mehmed ve Mehmed b. Ali şehâdetleriyle mezbûr Mustafa muvâcehesinde vech-i şer‘î üzere ba‘de’l-isbât ve’t-tahlîf zikr olunan bargiri müdde‘î-i mezbûr Ömer’e teslîme mezbûr Mustafa’ya tenbîh olunduğu huzûr-ı âlîlerine i‘lâm olundu. Fî 20 Ra sene 1153.