Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 544 Hüküm no: 745 Orijinal metin no: [85a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatıma Hatun’un, Emetullah Hatun hayatta iken parasını verip bir kısım eşyasını satın aldığına ve teslim etmeden vefat ettiğine dair iddiasını ispatlayamadığı Ma‘rûz Sâhibe-i arzuhâl Fâtıma Hatun bt. Abdullah ba‘de’t-ta‘rîf bi’t-terâzi Bâb Mahkemesi’nde meclis-i şer‘-i enverde derûn-ı arzuhâlde mezkûre müteveffât Emetullah Hatun’un min-ciheti’l-usûbeti’n-nesebiye hasren vârisi İsmail b. Mehmed mahzarında müteveffât-ı mezbûre Emetullah Hatun hâl-i hayâtında ve kemâl-i akl-ı sıhhatinde ve bin yüz kırk üç Receb-i şerîfinin dördüncü gününde yedinde mülk ve hakkı iken işbu yedimdeki müfredât defteri mantûkunca ma‘lûmü’l-ecnâs ve’l-mikdâr emti‘asını bana altmış guruşa bey‘ ve temlîk ben dahi ber-vech-i muharrer iştirâ ve kabûl eylediğimden sonra semeni olan meblağ-ı mezbûrdan benim zimmetimi ibrâ ve ıskāt edip ol vechile eşyâ-i ma‘lûme benim emlâk-i müşteriyem ve hakk-ı sırfım olmağla eşyâ-i mezkûreyi hayâtında mezbûre Emetullah bana teslîm etmeyip eşyâ-i mezkûre yedinde iken bin yüz elli târîhinde mezbûre Emetullah müteveffiye olmağla eşyâ-i mezkûre mevcûde ise a‘yânı müstehleke ise tereke-i vâfiye-i müteveffât-ı mezbûreden ba‘de’s-sübût kıymetlerini taleb ederim deyü ba‘de’d-da‘vâ ve’s-suâl vâris-i mezbûr İsmail husûs-ı mezbûru ikrâr edip lâkin mûrisem müteveffât-ı mezbûre Emetullah Hatun eşyâ-i mezkûreyi mezbûre Fâtıma’ya ölünceye değin kendiye hizmet etmek üzere şart-ı fâsid ile bey‘ ve semeninden zimmetini ibrâ etmekle şart-ı mezkûr üzere olan bey‘ zımnında olan ibrâ fâsid olduğuna binâen eşyâ-i muharrere-i mezkûre benim mülk-i mevrûsum olmuşdur deyü ba‘de’d-def‘ ve’l-inkâr ve isr-i talebi’l-beyyine mezbûr İsmail def‘-i mezkûrunu lede’t-tezkiye adâletleri zâhire olan Ömer Çelebi b. Mehmed nâm kimesne ile Saime bt. Mustafa ve Fâtıma bt. diğer Mustafa nâm hatunlar şehâdetleriyle mezbûre Fâtıma Hatun muvâcehesinde vech-i şer‘î üzere isbât etmeğin mûcebiyle müdde‘iye-i mezbûre Fâtıma Hatun mezbûr İsmail’e bî-vech-i şer‘î mu‘ârazadan men‘ olunduğu ba‘de’t-tescîl huzûr-ı âlîlerine i‘lâm olundu. Fî 24 Ra sene 1153.